జార్ఖండ్ విద్యార్థుల సెగ సోరెన్‌కు రాహుల్ లేఖ

నిరసనకారులను కలవండి
సమస్య పరిష్కరించాలని హితవు

జార్ఖండ్‌లో ప్రభుత్వ ఉద్యోగ నియామక పరీక్షల్లో అవకతవకలు జరిగాయన్న ఆరోపణలపై విద్యార్థుల ఆందోళన కొనసాగుతున్న వేళ కాంగ్రెస్ అగ్రనేత రాహుల్ గాంధీ కీలకంగా స్పందించారు. తన రాజకీయ మిత్రుడు, జార్ఖండ్ ముఖ్యమంత్రి హేమంత్ సోరెన్‌ను స్వయంగా నిరసన చేస్తున్న విద్యార్థులను కలవాలని కోరారు. ఆగస్టు 14న సోరెన్‌కు రాసిన లేఖలో విద్యార్థుల ఆందోళన 24వ రోజుకు చేరిందని, వారి నిరసన శాంతియుతంగా కొనసాగుతోందని పేర్కొన్నారు. విద్యార్థుల డిమాండ్లు న్యాయమైనవేనని రాహుల్ అభిప్రాయపడ్డారు. ప్రశాంతంగా నిరసన తెలిపే హక్కు ప్రజాస్వామ్యానికి కీలకమైన అంశమని ఆయన స్పష్టం చేశారు. జార్ఖండ్ ప్రభుత్వం విద్యార్థులతో చర్చలు ప్రారంభించడాన్ని స్వాగతించిన రాహుల్.. కొన్ని డిమాండ్లపై ప్రభుత్వం, విద్యార్థుల మధ్య ఇప్పటికే అంగీకారం వచ్చినట్లు పేర్కొన్నారు. అయినా ఆందోళన కొనసాగడం, కొందరు విద్యార్థులు నిరవధిక నిరాహార దీక్ష చేయడం ఆందోళనకరమని తెలిపారు.

పరీక్షల రద్దు.. స్వతంత్ర దర్యాప్తు డిమాండ్

రాంచీలోని జైపాల్ సింగ్ స్టేడియం వద్ద జూలై 29 నుంచి వేలాది మంది ఉద్యోగ ఆశావహులు నిరసన చేస్తున్నారు. 14వ జార్ఖండ్ పబ్లిక్ సర్వీస్ కమిషన్ సివిల్ సర్వీసెస్ పరీక్ష, JSSC-CGL సహా పలు నియామక పరీక్షల్లో అవకతవకలు జరిగాయని విద్యార్థులు ఆరోపిస్తున్నారు. పరీక్షల్లో సీట్లు రూ.50 లక్షల నుంచి రూ.కోటి వరకు విక్రయించారన్న ఆరోపణలు కూడా వినిపిస్తున్నాయి. ఈ ఆరోపణలపై స్వతంత్ర దర్యాప్తు జరపాలని విద్యార్థులు డిమాండ్ చేస్తున్నారు. ముఖ్యంగా 14వ JPSC సివిల్ సర్వీసెస్ పరీక్షను రద్దు చేసి CBIతో దర్యాప్తు చేయాలని లేదా రాష్ట్రానికి వెలుపల ఉన్న రిటైర్డ్ హైకోర్టు న్యాయమూర్తులతో కమిటీ ఏర్పాటు చేయాలని కోరుతున్నారు. పరీక్షల అక్రమాలు అర్హత ఉన్న అభ్యర్థుల భవిష్యత్తును దెబ్బతీస్తున్నాయని, నియామక వ్యవస్థపై నమ్మకాన్ని తగ్గిస్తున్నాయని వారు అంటున్నారు. జూలై 25 నుంచి 27 వరకు జరగాల్సిన JPSC కంబైన్డ్ సివిల్ సర్వీసెస్ మెయిన్స్ పరీక్షను కూడా “అనివార్య పరిస్థితుల” కారణంగా వాయిదా వేశారు.

మిత్రుడికి రాహుల్‌ గట్టి సందేశం

విద్యార్థుల సమస్యపై రాహుల్ నేరుగా సోరెన్‌కు లేఖ రాయడం రాజకీయంగా కూడా ప్రాధాన్యం సంతరించుకుంది. ముఖ్యమంత్రి స్వయంగా విద్యార్థుల ప్రతినిధులను కలిస్తే ప్రభుత్వం సమస్య పరిష్కారంపై ఉన్న నిబద్ధత మరింత స్పష్టమవుతుందని రాహుల్ పేర్కొన్నారు. మరోవైపు నిరసనకారులు మాత్రం రాహుల్‌కు తమ అసంతృప్తిని వెల్లడించారు. సోరెన్ మాట వినకపోతే జార్ఖండ్ ముక్తి మోర్చా నేతృత్వంలోని సంకీర్ణ ప్రభుత్వానికి కాంగ్రెస్ ఇస్తున్న మద్దతును ఉపసంహరించుకోవాలని కోరారు. రాహుల్ మద్దతు ప్రకటించినా ఇప్పటివరకు కాంక్రీట్ చర్య కనిపించలేదని వారు విమర్శించారు. హేమంత్ సోరెన్ రాజీనామా చేయాలని డిమాండ్ చేస్తూ ఆగస్టు 20న ఆయన నివాసాన్ని ముట్టడిస్తామని ప్రకటించారు. ఈ నేపథ్యంలో మిత్రపక్ష ప్రభుత్వంపై రాహుల్ ఒత్తిడి పెంచారా? విద్యార్థుల ఆందోళనకు సీఎం నేరుగా పరిష్కారం చూపుతారా? అన్నది ఇప్పుడు జార్ఖండ్ రాజకీయాల్లో ఆసక్తికరంగా మారింది.

#JharkhandStudents #RahulGandhi #HemantSoren #JharkhandProtests #JPSC #JSSC #RecruitmentExam #ExamIrregularities #StudentProtest #JharkhandPolitics #CBIProbe #Ranchi #GovernmentJobs #CivilServicesExam #Congress