హుందాయ్‌కు సీఎం రేవంత్ ఆహ్వానం .
తెలంగాణకు ఆటోమొబైల్‌ పరిశ్రమలు.
రూ.8,528 కోట్లతో జహీరాబాద్‌లో భారీ ప్రాజెక్టు.
తెలంగాణను దేశంలోనే కీలక ఆటోమొబైల్‌ తయారీ కేంద్రంగా తీర్చిదిద్దడమే లక్ష్యంగా ముఖ్యమంత్రి రేవంత్‌రెడ్డి అడుగులు వేస్తున్నారు. హైదరాబాద్‌లో హ్యుందాయ్ కార్ల తయారీ ప్లాంట్‌ను ఏర్పాటు చేయాలని సంస్థ యాజమాన్యానికి పిలుపునిచ్చారు. రాష్ట్రంలో పరిశ్రమల స్థాపనకు అవసరమైన అన్ని సహాయ సహకారాలు అందిస్తామని హామీ ఇచ్చారు. శుక్రవారం బోధి పెవిలియన్‌లో హ్యుందాయ్ మోటార్‌ ఇండియా ఇంజినీరింగ్‌ మేనేజింగ్‌ డైరెక్టర్‌ చాంగ్యాన్‌ చో నేతృత్వంలోని ప్రతినిధి బృందం సీఎంతో సమావేశమైంది. ఈ సందర్భంగా పెట్టుబడుల అవకాశాలు, జహీరాబాద్‌లో ప్రతిపాదిత ప్రాజెక్టు పురోగతిపై చర్చించారు. హైదరాబాద్‌లో తయారీ ప్లాంట్‌ ఏర్పాటు చేస్తే తెలంగాణ పారిశ్రామిక రంగానికి మరింత ఊతం లభిస్తుందని సీఎం ఆశాభావం వ్యక్తం చేశారు.
రూ.8,528 కోట్ల పెట్టుబడి.. 4,276 మందికి ఉద్యోగాలు
సంగారెడ్డి జిల్లా జహీరాబాద్‌లోని నేషనల్‌ ఇన్వెస్ట్‌మెంట్‌ అండ్‌ మ్యానుఫ్యాక్చరింగ్‌ జోన్‌లో 678 ఎకరాల విస్తీర్ణంలో హ్యుందాయ్ గ్లోబల్‌ ఆర్‌అండ్‌డీ కేంద్రాన్ని ఏర్పాటు చేయనున్నారు. రూ.8,528 కోట్ల పెట్టుబడితో చేపట్టనున్న ఈ ప్రాజెక్టు ద్వారా 4,276 మందికి ఉద్యోగావకాశాలు లభించనున్నాయి. వాహనాల రూపకల్పన, పరీక్షలు, పనితీరు పరిశీలన, నాణ్యతా ప్రమాణాల ధ్రువీకరణకు ఈ కేంద్రం ఉపయోగపడనుంది. రాబోయే కొద్ది నెలల్లో భూమిపూజకు సిద్ధమవుతున్నట్లు హ్యుందాయ్ ప్రతినిధులు సీఎంకు తెలిపారు. పెండింగ్‌ అనుమతులను త్వరగా పూర్తి చేయాలని అధికారులను రేవంత్‌రెడ్డి ఆదేశించారు. హైదరాబాద్‌లో రెండు దశాబ్దాలుగా కొనసాగుతున్న హ్యుందాయ్ ఇంజినీరింగ్‌ కార్యకలాపాలను జహీరాబాద్‌ కేంద్రం మరింత విస్తరించనుంది.
మౌలిక సదుపాయాలే తెలంగాణ బలం
దేశంలోని ప్రధాన నగరాలకు అనుసంధానంగా ఉండటం, అంతర్జాతీయ విమానాశ్రయం, రహదారులు, రైల్వే సదుపాయాలు హైదరాబాద్‌కు ప్రత్యేక బలమని సీఎం వివరించారు. ప్రత్యేక మొబిలిటీ క్లస్టర్లు, పెరి-అర్బన్‌ రీజియన్‌ (ప్యూర్) ప్రణాళికలతో తయారీ రంగాన్ని విస్తరించనున్నట్లు తెలిపారు. 2024 ప్రపంచ ఆర్థిక వేదిక సమావేశాల్లో హ్యుందాయ్‌తో జరిగిన చర్చల అనంతరం, 2025 జూన్‌లో ఆర్‌అండ్‌డీ ప్రాజెక్టుకు రాష్ట్ర మంత్రివర్గ ఉపసంఘం ఆమోదం తెలిపింది. భారత్‌ ఫ్యూచర్‌ సిటీ అభివృద్ధి ప్రణాళికను వివరించిన సీఎం, ఇన్వెస్ట్‌ తెలంగాణ గ్లోబల్‌ సమ్మిట్‌–2026కు హాజరుకావాలని సంస్థను ఆహ్వానించారు. తెలంగాణ రైజింగ్‌–2047 లక్ష్యాలకు తమ సంస్థ ప్రణాళికలు అనుగుణంగా ఉన్నాయని చాంగ్యాన్‌ చో తెలిపారు. రాష్ట్ర అభివృద్ధిలో భాగస్వామిగా కొనసాగుతామని హామీ ఇచ్చారు.
#Hyundai #HyundaiTelangana #HyderabadCarPlant #RevanthReddy #TelanganaInvestments #Zahirabad #HyundaiRnD #AutomobileIndustry #MakeInIndia #IndustrialDevelopment #JobCreation #TelanganaRising2047
