తిరుపతిలో నామినేషన్ల రణరంగం!

ఎంపీ గురుమూర్తి నుంచి లాక్కోవడంతో ఉద్రిక్తత.

తిరుపతిలో స్థానిక సంస్థల ఎన్నికల నామినేషన్ల వేళ ఉద్రిక్తత చోటుచేసుకుంది. వైఎస్సార్‌సీపీ మేయర్‌ అభ్యర్థి వాసు యాదవ్‌ తరఫున నామినేషన్‌ ప్రక్రియ కోసం వెళ్లిన తనను, ఎమ్మెల్సీ సిపాయి సుబ్రహ్మణ్యాన్ని టీడీపీ కార్యకర్తలు అడ్డుకున్నారని తిరుపతి ఎంపీ డాక్టర్‌ మద్దిల గురుమూర్తి ఆరోపించారు. మున్సిపల్‌ కార్పొరేషన్‌ కార్యాలయానికి ఎదురుగా ఉన్న నామినేషన్‌ కేంద్రానికి చేరుకోగా వందలాది మంది టీడీపీ నేతలు, కార్యకర్తలు చుట్టుముట్టారని తెలిపారు. వెనక్కి వెళ్లాలంటూ అడ్డుకున్నారని, ఆధార్‌ కార్డుతో పాటు నామినేషన్‌కు సంబంధించిన ఆధారాలు చూపించాలని పోలీసులు కోరిన సమయంలో తమ చేతుల్లోని పత్రాలను టీడీపీ కార్యకర్తలు లాక్కెళ్లారని ఆరోపించారు. ఈ పరిణామాలన్నీ జరుగుతున్నా పోలీసులు ప్రేక్షకపాత్ర వహించారని ఎంపీ మండిపడ్డారు.

పోలీసుల వైఫల్యమంటూ తీవ్ర విమర్శలు

నామినేషన్‌ కేంద్రం పరిసరాల్లో నిబంధనలు అమలు చేయాల్సిన పోలీసులే ఎంపీ, ఎమ్మెల్సీకి రక్షణ కల్పించలేకపోవడం దారుణమని గురుమూర్తి విమర్శించారు. ప్రజాప్రతినిధులు నామినేషన్‌ ప్రక్రియ పూర్తి చేసి సురక్షితంగా తిరిగి వెళ్లేలా చూడాల్సిన బాధ్యత పోలీసులపై ఉందన్నారు. అధికార పార్టీ ఒత్తిళ్లకు తలొగ్గి ప్రతిపక్ష నేతల ప్రజాస్వామ్య హక్కులను అడ్డుకోవడం ఎంతవరకు సమంజసమని ప్రశ్నించారు. కూటమి ప్రభుత్వంలో పోలీసులు చట్టాన్ని నిష్పక్షపాతంగా అమలు చేయకుండా అధికార పార్టీకి అనుకూలంగా వ్యవహరిస్తున్నారనే అనుమానాలు కలుగుతున్నాయని వ్యాఖ్యానించారు. టీడీపీ కార్యకర్తల కంటే పోలీసులే వైఎస్సార్‌సీపీ నేతలు, కార్యకర్తలను ఎక్కువగా ఇబ్బంది పెడుతున్నారని ఆరోపించారు. ఎన్నికల ప్రక్రియలో అన్ని పార్టీలకు సమాన అవకాశాలు కల్పించాలని డిమాండ్‌ చేశారు.

నామినేషన్ల వేళ మహిళలపై దాడులు

ఎమ్మార్పల్లిలోని 12వ వార్డుకు నామినేషన్‌ వేసేందుకు వెళ్లిన అభ్యర్థి మవితపై దాడి జరగగా, 15వ వార్డు కార్యాలయం సమీపంలో స్వర్ణ, పావనిలపై కూడా దాడి జరిగినట్లు తెలిపింది. టీడీపీ కార్యకర్తలు అడ్డుకుని పిడిగుద్దులు గుప్పించడంతో పాటు దుస్తులు చించేశారని బాధితులు ఆరోపించారు. ఘటనను వివరిస్తూ మహిళా అభ్యర్థులు కన్నీటిపర్యంతమయ్యారు. అక్కడే పోలీసులు ఉన్నా తమకు రక్షణ కల్పించలేదని ఆవేదన వ్యక్తం చేశారు. అధికార పార్టీకి పోలీసులు అండగా ఉంటున్నారని వైఎస్సార్‌సీపీ విమర్శించింది. అభ్యర్థులను అడ్డుకోవడం, మహిళలపై దాడులపై ఫిర్యాదులు చేసినా అధికారులు స్పందించడం లేదని ఆరోపించింది. వందలాది ఫిర్యాదులు అందించినప్పటికీ చర్యలు తీసుకోవడం లేదని పార్టీ నేతలు మండిపడ్డారు.

#Tirupati #TirupatiNews #LocalBodyElections #MaddilaGurumoorthy #YSRCP #TDP #ElectionTensions #NominationPapers #SipaiSubramanyam #VasuYadav #WomenCandidates #AndhraPradeshPolitics