సుప్రీం సాక్షిగా బయటపడ్డ రేవంత్ వైఫల్యం

బనకచర్లపై పిటిషన్ అంతా తప్పుల తడక
గురువు చంద్రబాబు కోసమే డ్రామాలు
షాబాద్ ఘటనపైనా హరీశ్ రావు తీవ్ర విమర్శలు

బనకచర్ల అంశంపై సుప్రీంకోర్టు చేసిన వ్యాఖ్యలు తెలంగాణ ప్రభుత్వ వైఫల్యాన్ని బయటపెట్టాయని మాజీ మంత్రి హరీశ్ రావు ఆరోపించారు. సంగారెడ్డిలోని ఎమ్మెల్యే క్యాంపు కార్యాలయంలో మీడియాతో మాట్లాడిన ఆయన, ముఖ్యమంత్రి రేవంత్ రెడ్డి రాష్ట్ర ప్రయోజనాల కంటే రాజకీయాలకే ప్రాధాన్యం ఇస్తున్నారని విమర్శించారు. మొదటి నుంచి బనకచర్ల వ్యవహారంలో ప్రభుత్వం నిర్లక్ష్యంగా వ్యవహరించిందని ఆరోపించారు.

చంద్రబాబు కోసమే డ్రామా

సుప్రీంకోర్టు పిటిషన్‌లో లోపాలు ఉన్నాయని స్పష్టం చేయడం ప్రభుత్వ వైఫల్యానికి నిదర్శనమని హరీశ్ రావు అన్నారు. కావాలనే తప్పులతో కేసు దాఖలు చేశారని ఆరోపించారు. కాంగ్రెస్ ప్రభుత్వం చర్యలు తీసుకుంటున్నట్లు ప్రజలను నమ్మించేందుకు బ్యాక్‌డేట్ లేఖలు రాసిందని విమర్శించారు. ఏడు నెలలుగా ప్రభుత్వం చేసిన పని ఏమిటో ప్రజలకు చెప్పాలని డిమాండ్ చేశారు. ముఖ్యమంత్రి రేవంత్ రెడ్డి తన రాజకీయ గురువు చంద్రబాబు నాయుడు ప్రయోజనాల కోసమే వ్యవహరిస్తున్నారని హరీశ్ రావు ఆరోపించారు. బనకచర్ల సమావేశానికి వెళ్లనని చెప్పి తర్వాత రహస్యంగా హాజరయ్యారని విమర్శించారు. కమిటీలో ఆదిత్యనాథ్ దాస్‌ను నియమించడం కూడా అనుమానాలకు తావిస్తోందని అన్నారు. తెలంగాణ ప్రయోజనాల విషయంలో ప్రభుత్వం పారదర్శకంగా వ్యవహరించడం లేదని ఆరోపించారు.

ఎన్‌వోసీపై అసెంబ్లీలో చర్చ కోరుతూ

ఎన్‌వోసీ పేరిట తెలంగాణ హక్కులను ఆంధ్రప్రదేశ్‌కు అప్పగించే ప్రయత్నం జరుగుతోందని హరీశ్ రావు ఆరోపించారు. ఈ అంశంపై వెంటనే అసెంబ్లీ సమావేశం నిర్వహించి పూర్తి వివరాలు వెల్లడించాలని డిమాండ్ చేశారు. దొంగచాటుగా నిర్ణయాలు తీసుకుంటే బీఆర్ఎస్ మౌనంగా ఉండదని హెచ్చరించారు. దేవాదుల ప్రాజెక్టులో ప్రభుత్వం పూర్తి స్థాయిలో నీటిని ఎత్తిపోసే చర్యలు చేపట్టలేదని హరీశ్ రావు విమర్శించారు. 2,500 క్యూసెక్కుల నీటిని ఎత్తాల్సి ఉండగా కేవలం ఆరు మోటర్లు మాత్రమే నడుపుతున్నారని అన్నారు. బీఆర్ఎస్ క్షేత్రస్థాయిలో ఒత్తిడి తీసుకురావడంతోనే ప్రభుత్వం మోటార్లు ప్రారంభించిందని చెప్పారు. కేసీఆర్ హయాంలో నిర్మించిన ప్రాజెక్టులను సక్రమంగా వినియోగించడంలో కూడా కాంగ్రెస్ ప్రభుత్వం విఫలమైందని హరీశ్ రావు తీవ్ర విమర్శలు చేశారు.

చట్టవ్యవస్థపై ఆరోపణలు

షాబాద్ ఘటనను ప్రస్తావిస్తూ పోలీసుల పనితీరుపై హరీశ్ రావు తీవ్ర విమర్శలు చేశారు. బీఆర్ఎస్ కార్యకర్తలపై వెంటనే చర్యలు తీసుకునే పోలీసులు, నేరస్థుడిని పట్టుకోవడంలో ఎందుకు ఆలస్యం చేశారని ప్రశ్నించారు. పోలీసు స్టేషన్లు అధికార పార్టీ నేతల ప్రభావంలో నడుస్తున్నాయని ఆరోపించారు. మహిళల భద్రత విషయంలో ప్రభుత్వం పూర్తిగా విఫలమైందని అన్నారు. సీఎంపైనా తీవ్ర విమర్శలు చేశారు.

పాదయాత్రతో పోరాటం

సంగమేశ్వర–బసవేశ్వర ప్రాజెక్టు పనులు నిలిపివేయడం వల్ల మెదక్ జిల్లా రైతులు నష్టపోతున్నారని హరీశ్ రావు అన్నారు. ఈ అంశంపై త్వరలోనే బసవేశ్వర విగ్రహం నుంచి సంగమేశ్వర ప్రాజెక్టు వరకు భారీ పాదయాత్ర చేపడతామని ప్రకటించారు. ప్రజా సమస్యలపై బీఆర్ఎస్ పోరాటం కొనసాగుతుందని స్పష్టం చేశారు. వచ్చే ఎన్నికల్లో కాంగ్రెస్‌కు ప్రజలు గట్టి తీర్పు ఇస్తారని, మెదక్ జిల్లాలో అన్ని అసెంబ్లీ స్థానాల్లో బీఆర్ఎస్ విజయం సాధిస్తుందని హరీష్ రావు ధీమా వ్యక్తం చేశారు.