సిరిసిల్ల, సిద్దిపేటపై కాంగ్రెస్ గురి.
అసెంబ్లీకి రా.. అన్నీ తేల్చుకుందాం.
సీట్లు పెరిగితే 117, లేదంటే 90 గెలుస్తాం .
వెయ్యి రోజుల్లో కేసీఆర్కు రూ. 22 కోట్లు ఖర్చు.
ప్రభుత్వ సొమ్ము తీసుకొని అసెంబ్లీకి రావట్లేదు.
ప్రజా సమస్యలు కేసీఆర్ ప్రస్తావించరా?
ఏడాదిలో 70 వేల ఉద్యోగాలు భర్తీ చేశాం.
వంద పడకల ప్రభుత్వ ఆస్పత్రి ప్రారంభం.
నకిరేకల్ బహిరంగ సభలో సీఎం రేవంత్ రెడ్డి.
నల్గొండ జిల్లా నకిరేకల్ సభ వేదికగా సీఎం రేవంత్రెడ్డి బీఆర్ఎస్ అధినేత కేసీఆర్కు సూటి సవాల్ విసిరారు. ఏ అంశంపైనైనా చర్చకు తాను సిద్ధమని, కేసీఆర్కు ధైర్యం ఉంటే అసెంబ్లీకి రావాలని అన్నారు. ప్రభుత్వ సొమ్ము తీసుకుంటూ అసెంబ్లీకి రాకపోవడం ఎందుకని, ప్రజల సమస్యలను సభలో ఎందుకు ప్రస్తావించడం లేదని ప్రశ్నించారు. వెయ్యి రోజుల్లో కేసీఆర్పై రూ.22 కోట్ల ప్రభుత్వ వ్యయం జరిగిందని ఆరోపించారు. తెలంగాణలో బీఆర్ఎస్ మొక్కను మళ్లీ మొలకెత్తనివ్వబోమని వ్యాఖ్యానించారు. వచ్చే ఎన్నికల్లో కాంగ్రెస్ అధికారంలోకి వస్తుందని ధీమా వ్యక్తం చేస్తూ సిరిసిల్ల, సిద్దిపేటలోనూ కాంగ్రెస్ జెండా ఎగురుతుందని ప్రకటించారు. “ఈ నెలాఖరుకు సిరిసిల్లకు వస్తా.. కాంగ్రెస్ జెండా ఎగరవేస్తా. వచ్చే నెల సిద్దిపేటకు వస్తా.. కాస్కోండి కల్వకుంట్ల కుటుంబమా” అంటూ ఘాటు వ్యాఖ్యలు చేశారు.
117 సీట్లపై రేవంత్ ధీమా
రాబోయే ఎన్నికల్లో కాంగ్రెస్ గెలుపుపై రేవంత్రెడ్డి కీలక వ్యాఖ్యలు చేశారు. అసెంబ్లీ సీట్లు పెరిగితే కాంగ్రెస్ 117 స్థానాలు గెలుస్తుందని, ప్రస్తుత సీట్లే కొనసాగితే 90 సీట్లు సాధిస్తామని స్పష్టం చేశారు. తమ ప్రభుత్వం అధికారంలోకి వచ్చిన ఏడాదిలోనే 70 వేల ఉద్యోగాలు భర్తీ చేశామని తెలిపారు. గత ప్రభుత్వం అమలు చేసిన పథకాలను రద్దు చేయలేదని, వాటిని మరింత మెరుగ్గా కొనసాగిస్తున్నామని చెప్పారు. రైతులకు రైతుభరోసా, ధాన్యం కొనుగోలు, బోనస్, ఉచిత విద్యుత్ అందిస్తున్నామని తెలిపారు. బీఆర్ఎస్ ప్రభుత్వం చెల్లించకుండా వెళ్లిపోయిన రూ.36 వేల కోట్ల రైతుభరోసా నిధులను రైతుల ఖాతాల్లో జమ చేశామని పేర్కొన్నారు. ఆర్టీసీ ఉచిత ప్రయాణం కోసం రూ.11 వేల కోట్లు కేటాయించామని, కోటి మంది మహిళలు బస్సుల్లో ప్రయాణిస్తున్నారని చెప్పారు. మహిళలకు పెట్రోల్ బంకులు, సోలార్ నిర్వహణ వంటి అవకాశాలు కల్పిస్తున్నామని వివరించారు.
నకిరేకల్లో అభివృద్ధికి శ్రీకారం
రాజకీయ విమర్శలతో పాటు నకిరేకల్ అభివృద్ధిపై సీఎం దృష్టి పెట్టారు. రూ.32 కోట్లతో నిర్మించిన 100 పడకల ప్రభుత్వ ఆస్పత్రిని ప్రారంభించారు. ఆస్పత్రిలోని విభాగాలను పరిశీలించి, రోగులకు అందించే సేవలపై వైద్యులను అడిగి తెలుసుకున్నారు. నియోజకవర్గంలో రూ.345 కోట్లతో 12 అభివృద్ధి పనులకు శ్రీకారం చుట్టారు. యంగ్ ఇండియా ఇంటిగ్రేటెడ్ స్కూల్, సమీకృత మండల కార్యాలయాల సముదాయ నిర్మాణాలకు శంకుస్థాపన చేశారు. నకిరేకల్ కాంగ్రెస్కు కంచుకోటగా మారిందని, వేముల వీరేశం దానిని నిరూపించారని రేవంత్ అన్నారు. అదే సమయంలో కేసీఆర్పై వ్యక్తిగత విమర్శలు చేస్తూ “నీ సంస్కారం ఏంటో.. నా సంస్కారం ఏంటో అసెంబ్లీకి రా చూసుకుందాం” అంటూ సవాల్ చేశారు. తెలంగాణను బీఆర్ఎస్ హయాంలో దోచుకున్నారని ఆరోపించిన సీఎం, వచ్చే ఎన్నికల్లోనూ కాంగ్రెస్ ప్రభుత్వమే వస్తుందని విశ్వాసం వ్యక్తం చేశారు.
#RevanthReddy #KCR #RevanthReddyKCR #TelanganaPolitics #TelanganaCongress #BRS #CongressVsBRS #Sircilla #Siddipet #KCRChallenge #RevanthReddySpeech #TelanganaElections #TelanganaAssembly #Nakrekal #CongressTelangana #TelanganaPoliticalNews
