నిర్లక్ష్యం చేస్తే సస్పెన్షన్‌ తప్పదు!
సరఫరా లోపాలపై సీఎం ఆగ్రహం .
రాష్ట్రంలో విద్యుత్ సరఫరా అంతరాయాలపై ముఖ్యమంత్రి రేవంత్‌రెడ్డి తీవ్ర ఆగ్రహం వ్యక్తం చేశారు. ప్రజలకు ఇబ్బందులు కలిగించే అధికారులను ఎట్టి పరిస్థితుల్లోనూ ఉపేక్షించేది లేదని, నిర్లక్ష్యంగా వ్యవహరిస్తే స్పెషల్‌ సీఎస్‌, జెన్‌కో సీఎండీ స్థాయి అధికారులనూ సస్పెండ్‌ చేస్తానని హెచ్చరించారు. బుధవారం హైదరాబాద్‌లో విద్యుత్ శాఖ అధికారులతో నిర్వహించిన సమీక్షలో సరఫరా పరిస్థితిపై నిలదీశారు. విద్యుత్ అంతరాయాలు లేకుండా చర్యలు తీసుకోవాలని ఎన్నిసార్లు ఆదేశించినా మార్పు ఎందుకు రావడం లేదని ప్రశ్నించారు. ప్రజలకు ఇబ్బందులు ఎదురైతే ప్రభుత్వమే సమాధానం చెప్పాల్సి వస్తుందని స్పష్టం చేశారు. అంతరాయాలకు గల కారణాలను వెంటనే తనకు వివరించాలని అధికారులను ఆదేశించారు.
బొగ్గు ఉన్నా ఉత్పత్తి ఎందుకు పెరగడం లేదు?
రానున్న రోజుల్లో విద్యుత్ కొరత ముప్పు పొంచి ఉన్నా ఉత్పత్తి పెంచకపోవడంపై సీఎం అసహనం వ్యక్తం చేశారు. నైనీ, మహానది గనుల నుంచి బొగ్గు సరఫరాకు లింకేజీలు ఏర్పాటు చేసినప్పటికీ యాదాద్రి విద్యుత్ ప్లాంట్‌లో పూర్తి సామర్థ్యంతో ఉత్పత్తి ఎందుకు జరగడం లేదని ప్రశ్నించారు. రైతుల పంటలను కాపాడేందుకు అవసరమైన విద్యుత్ అందించాలని ఇప్పటికే పలుమార్లు సూచించినా అధికారులు పట్టించుకోవడం లేదని మండిపడ్డారు. ప్రజలకు నిరంతర విద్యుత్ సరఫరా కల్పించేలా తక్షణ చర్యలు చేపట్టాలని ఆదేశించారు. భవిష్యత్తులో విద్యుత్ కొరత తలెత్తకుండా ముందస్తు ప్రణాళికలు సిద్ధం చేయాలని స్పష్టం చేశారు. ప్రజలకు ఇబ్బందులు కలిగించే నిర్లక్ష్యాన్ని సహించేది లేదని, బాధ్యులపై కఠిన చర్యలు తప్పవని రేవంత్‌రెడ్డి తేల్చిచెప్పారు.
#RevanthReddy #Telangana #ElectricitySupply #PowerCuts #TelanganaPowerDepartment #YadadriPowerPlant #PowerGeneration #TelanganaFarmers #PowerShortage #TelanganaGovernment #TelanganaNews #PowerOfficials
