తిరుపతిపై తిరకాసు.. ఇంతకీ… మేయర్ ఎవరు బాసు?

తిరుపతిపై తిరకాసు..
ఇంతకీ… మేయర్ ఎవరు బాసు?

తిరుపతి మేయర్‌ పీఠం ఇప్పుడు సాధారణ స్థానిక పదవిగా కనిపించడం లేదు. శ్రీవారి నగరానికి మేయర్‌గా ఉండటం రాజకీయంగా ప్రత్యేక ప్రతిష్ఠగా మారడంతో అధికార కూటమిలోనే పోటీ వేడెక్కుతోంది. టీడీపీ, జనసేన, బీజేపీ రాష్ట్రంలో కలిసి అధికారాన్ని పంచుకుంటున్నా.. తిరుపతి కార్పొరేషన్‌ విషయానికి వచ్చేసరికి మూడు పార్టీల లెక్కలు వేర్వేరుగా కనిపిస్తున్నాయి. ముఖ్యంగా టీడీపీ, జనసేన మేయర్‌ పదవిపై బలమైన హక్కులు వినిపిస్తున్నాయి. బీజేపీ కూడా తిరుపతిపై ప్రత్యేక దృష్టి పెట్టినట్లు రాజకీయ చర్చ సాగుతోంది. మేయర్లను ప్రజలే నేరుగా ఎన్నుకునే కొత్త విధానం అమల్లోకి రావడంతో ఈసారి మేయర్‌ పదవికి మరింత ప్రాధాన్యం ఏర్పడింది. 2026లో జారీ చేసిన నిబంధనల ప్రకారం మేయర్‌ను నేరుగా ఓటర్లు ఎన్నుకుంటారు. పదవీకాలం ఐదేళ్లు. తిరుపతి కార్పొరేషన్‌లో గతంలో ఉన్న 50 డివిజన్లను 66కు పెంచుతూ ప్రభుత్వం తుది నోటిఫికేషన్‌ జారీ చేసింది. దీంతో డివిజన్ల పంపకం కూడా కూటమికి కీలక పరీక్షగా మారింది. టీడీపీ శిబిరంలో మాజీ ఎమ్మెల్యే ఎ. మోహన్‌, ధంపూరి భాస్కర్‌ యాదవ్‌, పెనుమాడు ప్రణీత్‌, ఆర్‌.సి. మునికృష్ణ, పుష్పావతి యాదవ్‌, ఎం. సుగుణమ్మ, జి. నరసింహ యాదవ్‌, మబ్బు దేవనారాయణరెడ్డి వంటి పేర్లు చర్చలో ఉన్నట్లు రాజకీయ వర్గాల్లో ప్రచారం సాగుతోంది. మరోవైపు జనసేనలో పసుపులేటి హరిప్రసాద్‌, కిరణ్‌ రాయల్‌, తమ్మిశెట్టి వెంకటేశ్వర్లు వంటి పేర్లు వినిపిస్తున్నాయి. మరోవైపు సుగుణమ్మ మనుమరాలు కీర్తన అలియాస్ కీర్తి జనసేనలో చేరి మేయర్ పదవి రేసులో నిలవాలని చూస్తున్నట్టుగా ప్రచారం జరుగుతోంది. తిరుపతి మేయర్‌ రేసులో టీడీపీ, జనసేన మధ్య పోటీ తీవ్రంగా ఉందని తాజా రాజకీయ నివేదికలు కూడా పేర్కొంటున్నాయి. అంటే ప్రత్యర్థి పార్టీలను ఎదుర్కొనే ముందే కూటమి భాగస్వాములు తమలో తాము సీట్ల లెక్కలు తేల్చుకోవాల్సిన పరిస్థితి. ఇదే ఇప్పుడు తిరుపతి రాజకీయాల్లో అసలు ఉత్కంఠ.

టీడీపీకి ఆశ.. జనసేనకు హక్కు
టీడీపీకి తిరుపతిలో తన సంస్థాగత బలం, అధికార పార్టీగా ఉన్న ప్రయోజనం, నగర రాజకీయాల్లో ఉన్న పాత సంబంధాలపై నమ్మకం ఉంది. అందుకే మేయర్‌ పీఠంపై ఆ పార్టీ ఆశలు సహజంగానే బలంగా కనిపిస్తున్నాయి. అయితే జనసేన కూడా వెనక్కి తగ్గే పరిస్థితిలో లేదు. తిరుపతి అసెంబ్లీ స్థానం నుంచి జనసేనకు చెందిన ఆరణి శ్రీనివాసులు 2024లో గెలిచిన విషయాన్ని ఆ పార్టీ నేతలు తమ వాదనకు ప్రధాన ఆధారంగా చూపుతున్నారు. అంతేకాదు, ఆయన గెలుపు తర్వాత పలువురు వైఎస్సార్‌సీపీ కార్పొరేటర్లు జనసేనలో చేరడంతో నగర కార్పొరేషన్‌లో ఆ పార్టీ బలం పెరిగిందని తాజా నివేదికలు పేర్కొన్నాయి. కీలక నామినేటెడ్‌ పదవుల్లో టీడీపీకి ఇప్పటికే ప్రాధాన్యం దక్కిందని జనసేన వర్గాలు చెబుతున్న నేపథ్యంలో స్థానిక సంస్థల్లో తమకు కూడా తగిన వాటా రావాలని కోరుతున్నట్లు సమాచారం. ఇదే అసలు బేరసారాల కేంద్రంగా మారుతోంది. అసెంబ్లీ ఎన్నికల్లో సీట్ల సర్దుబాటు ఒక లెక్క.. కార్పొరేషన్‌ ఎన్నికల్లో ప్రతి డివిజన్‌ మరో లెక్క. ఏ ప్రాంతంలో ఏ పార్టీకి బలం ఉంది? ఏ సామాజిక వర్గం ఎవరితో ఉంది? ఎవరి అభ్యర్థికి వ్యక్తిగత ప్రజాబలం ఉంది? మేయర్‌ అభ్యర్థి వల్ల కూటమి ఓట్లు ఏకమవుతాయా? ఇలాంటి ప్రశ్నలు ఇప్పుడు కూటమి పెద్దల ముందున్నాయి. బీజేపీ కూడా తిరుపతి వంటి ఆధ్యాత్మిక ప్రాధాన్యం ఉన్న నగరంలో తన రాజకీయ స్థలాన్ని విస్తరించాలనే ఆసక్తితో ఉందన్న ప్రచారం సాగుతోంది. రాష్ట్రంలోని కీలక మేయర్‌ స్థానాలపై జనసేన, బీజేపీ డిమాండ్లు పెరుగుతున్నాయని వేరే చెప్పాల్సిన పని లేదు. ఇదే సమయంలో టీడీపీ సీనియర్‌ నేత వూకా విజయ్‌కుమార్‌ సెప్టెంబరు 29న పార్టీకి రాజీనామా చేయడం మరో చర్చకు దారితీసింది. ఆయన వ్యక్తిగత కారణాలతో తప్పుకుంటున్నట్లు ప్రకటించినా, కూటమిలోని మరో పార్టీ వైపు వెళ్లవచ్చన్న ఊహాగానాలు మొదలయ్యాయి. అంటే ముందస్తు వ్యూహంలో భాగంగా టీడీపీ నుంచి ఇంకో కూటమి పార్టీలోకన్నమాట. అయితే ఆయన మేయర్‌ పోటీపై అధికారికంగా ప్రకటన చేయకున్నా ఆయన నిర్ణయాలకు కారణాలుంటాయమని మాత్రం చెప్పొచ్చు.

రిజర్వేషన్‌ తర్వాతే అసలు చిత్రం
తిరుపతి మేయర్‌ పీఠంపై ఇంతటి ఆసక్తికి నగర ప్రత్యేకతే ప్రధాన కారణం. తిరుమల శ్రీవారి దర్శనానికి వచ్చే కోట్లాది భక్తులకు తిరుపతి కీలక ప్రవేశ ద్వారం. రహదారులు, పారిశుద్ధ్యం, ట్రాఫిక్‌, తాగునీరు, పార్కులు, భక్తుల వసతులు, నగర అభివృద్ధి వంటి అంశాలు మేయర్‌ పాలనతో నేరుగా ముడిపడి ఉంటాయి. అందుకే ఈ పదవి రాజకీయ ప్రతిష్ఠతో పాటు పరిపాలనా బాధ్యతను కూడా మోస్తుంది. ఇప్పుడు 66 డివిజన్లతో కొత్త రాజకీయ పటం సిద్ధమైంది. రిజర్వేషన్‌ ఖరారు కావడం, డివిజన్ల వారీగా అభ్యర్థుల ఎంపిక జరగడం, కూటమి భాగస్వాముల మధ్య సీట్ల పంపకం పూర్తవడం తర్వాతే అసలు చిత్రం స్పష్టమవుతుంది. ప్రస్తుతం వినిపిస్తున్న పేర్లలో కొందరు రిజర్వేషన్‌ కారణంగా తప్పుకోవచ్చు. మరికొందరు అనూహ్యంగా ముందుకు రావచ్చు. మేయర్‌ అభ్యర్థి ఎంపిక కంటే ముందు డివిజన్ల పంపకమే కూటమికి మొదటి అగ్నిపరీక్ష కానుంది. మేయర్‌ ఎన్నిక నేరుగా ప్రజల చేతుల్లోకి రావడంతో అభ్యర్థి వ్యక్తిగత ప్రజాబలం కూడా కీలకంగా మారనుంది. అందుకే కూటమి లోపల సమన్వయం లేకపోతే ఒకే ఓటు బ్యాంకు కోసం మూడు పార్టీలు పోటీ పడే పరిస్థితి రావచ్చు. టీడీపీ తన బలాన్ని నమ్ముతోంది. జనసేన తన ఎమ్మెల్యే ప్రాతినిధ్యాన్ని, పెరిగిన కార్పొరేటర్ల బలాన్ని చూపిస్తోంది. బీజేపీ తిరుపతి ఆధ్యాత్మిక ప్రాధాన్యాన్ని రాజకీయ అవకాశంగా చూస్తోంది. ఈ మూడు లెక్కలు కలిసిన చోటే మేయర్‌ పీఠం అసలు పందెం మొదలవుతుంది. ఎన్నికలు ఇంకా పూర్తికాకముందే ఎవరి పీఠం ఖాయమని చెప్పడం సాధ్యం కాదు. శ్రీవారి నగరంలో భక్తులు ‘గోవిందా’ అంటూ కొండపైకి సాగుతుంటే.. రాజకీయ నాయకులు ‘మేయర్‌’ అంటూ కింద లెక్కలు వేస్తున్నారు. చివరకు ఆ కుర్చీ ఎవరికి దక్కినా అది కేవలం రాజకీయ అలంకారం కాకూడదు. తిరుపతి ప్రజలకు మెరుగైన నగర పాలన, భక్తులకు సౌకర్యాలు, పరిశుభ్రమైన నగరం, సమర్థవంతమైన మౌలిక వసతులు అందించడమే అసలు పరీక్ష. కూటమిలో ఎవరి ఎత్తు పైచేయి సాధిస్తుందో ఎన్నికలే తేల్చాలి. కానీ ఇప్పుడే మాత్రం ఒక విషయం స్పష్టం.. గోవిందుడి నగరంలో మేయర్‌ పీఠం కోసం రాజకీయ గోవిందా మొదలైంది!

#Tirupati #TirupatiMayor #TirupatiMunicipalCorporation #TDP #JanaSena #BJP #TirupatiPolitics #MayorElection #LocalBodyElections #APLocalElections #AraniSrinivasulu #KiranRoyal #WardDelimitation #PoliticalEquations #AndhraPradeshPolitics