రోజూ 7 వేల టన్నుల చెత్త క్లియరెన్స్.
ఆంధ్రప్రదేశ్లో ప్రతిరోజూ సుమారు 7,000 టన్నుల చెత్త ఉత్పత్తి అవుతోందని పురపాలక శాఖ మంత్రి నారాయణ తెలిపారు. రాజమహేంద్రవరంలో పర్యటించిన సందర్భంగా ఆయన మాట్లాడుతూ గత ప్రభుత్వం చెత్త పన్ను వసూలు చేసినా మున్సిపాలిటీల్లో భారీగా చెత్త పేరుకుపోయిందని విమర్శించారు. ప్రస్తుతం రాష్ట్రవ్యాప్తంగా పేరుకుపోయిన 70 లక్షల టన్నుల చెత్తను అక్టోబర్ నాటికి పూర్తిగా తొలగించే లక్ష్యంతో ప్రభుత్వం పనిచేస్తోందని స్పష్టం చేశారు.
వ్యర్థాల నుంచి విద్యుత్ ఉత్పత్తి
2014–19 మధ్య రాష్ట్రంలో 10 వేస్ట్ టు ఎనర్జీ ప్లాంట్లు ఏర్పాటు చేయాలని నిర్ణయించినా గత ప్రభుత్వం వాటిని రద్దు చేసిందని మంత్రి ఆరోపించారు. కూటమి ప్రభుత్వం అధికారంలోకి వచ్చిన తర్వాత కడప, కర్నూలు, తిరుపతి, నెల్లూరు, విజయవాడ, పెద్దాపురంలో వేస్ట్ టు ఎనర్జీ ప్లాంట్ల ఏర్పాటుకు చర్యలు చేపట్టినట్లు తెలిపారు. పెద్దాపురం ప్లాంట్ పూర్తయిన తర్వాత రాజమహేంద్రవరం నుంచి వచ్చే చెత్తను అక్కడికి తరలిస్తామని చెప్పారు.
107 మున్సిపాలిటీల్లో ప్లాంట్లు
ఘన వ్యర్థాల నిర్వహణను మెరుగుపరిచేందుకు రాష్ట్రంలోని 107 మున్సిపాలిటీల్లో ఫ్రెష్ వేస్ట్ ప్లాంట్లు ఏర్పాటు చేస్తున్నామని మంత్రి నారాయణ వెల్లడించారు. సెప్టెంబర్ నెలాఖరులోగా వాటి పనులు పూర్తిచేసి వ్యర్థాల నిర్వహణకు అందుబాటులోకి తీసుకురావాలని లక్ష్యంగా పెట్టుకున్నట్లు తెలిపారు. మరోవైపు రాష్ట్రంలోని అన్ని మున్సిపాలిటీలకు ఒకేసారి ఎన్నికలు నిర్వహించాలన్నది సీఎం చంద్రబాబు ఆలోచనగా మంత్రి చెప్పారు. విలీన గ్రామాల అంశంపై కోర్టు తీర్పు వచ్చిన తర్వాత ఎన్నికల నిర్వహణపై నిర్ణయం తీసుకుంటామని స్పష్టం చేశారు.
#AndhraPradesh #WasteManagement #GarbageClearance #70LakhTonnes #WasteToEnergy #SolidWasteManagement #MinisterNarayana #Municipalities #WasteManagementAP #ChandrababuNaidu #CleanAndhraPradesh #APGovernment
