పీవీ సింధు స్పోర్ట్స్ అకాడమీకి శ్రీకారం.
విశాఖపట్నంలో పీవీ సింధు సెంటర్ ఫర్ స్పోర్ట్స్ ఎక్స్లెన్స్ నిర్మాణానికి విద్య, ఐటీ శాఖ మంత్రి నారా లోకేశ్ భూమిపూజ చేశారు. అరిలోవలోని తోటగరువులో ఏర్పాటు కానున్న ఈ అకాడమీ ప్రపంచ స్థాయి క్రీడాకారులను తయారు చేసే కేంద్రంగా మారుతుందని ఆయన తెలిపారు. యువతలో అపారమైన ప్రతిభ దాగి ఉందని, సరైన శిక్షణ, ఆధునిక సదుపాయాలు లభిస్తే ఒలింపిక్స్ స్థాయి విజేతలు తయారవుతారని పేర్కొన్నారు. ఎలాంటి అత్యాధునిక వసతులు లేకున్నా పట్టుదల, క్రమశిక్షణతో పీవీ సింధు ప్రపంచ ఛాంపియన్గా, ఒలింపిక్ పతక విజేతగా ఎదిగిందని గుర్తు చేశారు. ప్రతి ఛాంపియన్ విజయానికి తల్లిదండ్రుల ప్రోత్సాహం, కోచ్ల మార్గదర్శకత్వం కీలకమని లోకేశ్ అన్నారు. విశాఖలో నిర్మాణం చేపడుతున్న ఈ అకాడమీ రాష్ట్ర క్రీడా రంగానికి కొత్త దిశను చూపుతుందని ఆయన ఆశాభావం వ్యక్తం చేశారు.
బ్యాడ్మింటన్కే కాదు.. అన్ని క్రీడలకు వేదిక
ఈ అకాడమీ కేవలం బ్యాడ్మింటన్కే పరిమితం కాదని మంత్రి స్పష్టం చేశారు. స్విమ్మింగ్, జిమ్నాస్టిక్స్, షూటింగ్, వెయిట్లిఫ్టింగ్, బాస్కెట్బాల్, ఫుట్బాల్ వంటి అనేక క్రీడలకు ఇది ప్రధాన శిక్షణ కేంద్రంగా అభివృద్ధి చెందుతుందని వివరించారు. ఆస్ట్రేలియా, ఖతార్ తరహాలో అంతర్జాతీయ ప్రమాణాలతో క్రీడాకారులను తీర్చిదిద్దాలన్నదే ప్రభుత్వ లక్ష్యమని చెప్పారు. ముఖ్యమంత్రి చంద్రబాబు 1990ల నుంచే క్రీడల అభివృద్ధికి ప్రాధాన్యం ఇచ్చారని, ప్రభుత్వ ఉద్యోగాల్లో క్రీడాకారులకు అవకాశాలు కల్పిస్తూ క్రీడా విప్లవానికి బాటలు వేశారని గుర్తు చేశారు. తరగతి గది విద్య జ్ఞానాన్ని అందిస్తే, క్రీడలు వ్యక్తిత్వాన్ని, క్రమశిక్షణను, పోరాట స్ఫూర్తిని పెంపొందిస్తాయని అన్నారు. అందుకే రాష్ట్రంలో ప్రతి శనివారం “నో బ్యాగ్ డే” అమలు చేస్తున్నామని తెలిపారు. ప్రతి చిన్నారిలో ఉన్న సహజ ప్రతిభను గుర్తించి ప్రోత్సహించడమే ప్రభుత్వ ప్రధాన లక్ష్యమని, విశాఖలోని ఈ అకాడమీ ఆంధ్రప్రదేశ్ను దేశ క్రీడా పటంలో అగ్రస్థానంలో నిలబెట్టే కేంద్రంగా మారుతుందని మంత్రి నారా లోకేశ్ విశ్వాసం వ్యక్తం చేశారు.
#PVSindhu #SportsAcademy #Visakhapatnam #AndhraPradesh #NaraLokesh #SportsDevelopment #OlympicChampions #AthleteTraining #Badminton #SportsInfrastructure #ChandrababuNaidu #APSports
