కొత్త వైరస్ స్ట్రెయిన్ లేదు ఆందోళన వద్దన్న ఐసీఎంఆర్

దేశంలో హెచ్1ఎన్1 కేసులు పెరుగుతున్న నేపథ్యంలో ఇండియన్ కౌన్సిల్ ఆఫ్ మెడికల్ రీసెర్చ్ కీలక ప్రకటన చేసింది. ప్రస్తుతం భారత్‌లో వ్యాప్తిలో ఉన్న హెచ్1ఎన్1 వైరస్‌కు కొత్త స్ట్రెయిన్‌ ఏదీ గుర్తించలేదని, ప్రజలు ఆందోళన చెందాల్సిన అవసరం లేదని స్పష్టం చేసింది. దేశంలో ప్రస్తుతం చలామణిలో ఉన్న ఇన్‌ఫ్లుయెంజా ఏ (హెచ్1ఎన్1) వైరస్‌లు A/Missouri/11/2025 (H1N1) pdm09 తరహా వైరస్‌కు చెందినవని తెలిపింది. ఇవి 2025 నుంచి వ్యాప్తిలో ఉన్న 6B.1A.5a2a క్లేడ్‌లోని D.3.1.1 సబ్‌క్లేడ్‌కు చెందినవని వివరించింది. ప్రస్తుతం వ్యాప్తిలో ఉన్న వైరస్‌ రకాలు ఉత్తర అర్ధగోళానికి సిఫారసు చేసిన వ్యాక్సిన్‌ స్ట్రెయిన్‌లతో సరిపోలుతున్నాయని ఐసీఎంఆర్ వెల్లడించింది.

సాధారణ ఫ్లూగా తగ్గిపోయే అవకాశం

హెచ్1ఎన్1తో వచ్చే జ్వరం, దగ్గు, తలనొప్పి, ఒళ్లు నొప్పులు వంటి లక్షణాలు సాధారణంగా కనిపిస్తాయని ఐసీఎంఆర్ తెలిపింది. సీజనల్‌ ఇన్‌ఫ్లుయెంజా, హెచ్1ఎన్1 ఎక్కువగా స్వయంగా తగ్గిపోయే వ్యాధేనని పేర్కొంది. సరైన విశ్రాంతి, అవసరమైన వైద్య సంరక్షణతో చాలామంది కోలుకుంటారని వివరించింది. అయితే చిన్నారులు, వృద్ధులు, ఇప్పటికే ఇతర ఆరోగ్య సమస్యలు ఉన్నవారు సమస్యలకు గురయ్యే ప్రమాదం ఎక్కువగా ఉంటుందని హెచ్చరించింది. లక్షణాలు కొనసాగినా, తీవ్రత పెరిగినా వెంటనే వైద్యులను సంప్రదించాలని సూచించింది. దేశంలో ఈ ఏడాది వర్షాకాలంలో హెచ్1ఎన్1 కేసులు పెరిగాయని కేంద్ర ఆరోగ్య మంత్రిత్వ శాఖ కూడా తెలిపింది. పరిస్థితిని నిరంతర పర్యవేక్షణలో ఉంచామని స్పష్టం చేసింది.

వ్యాక్సిన్‌పై స్పష్టత

ఢిల్లీ, కర్ణాటక, ముంబై, చెన్నై, కేరళలోని కొన్ని ప్రాంతాల్లో ఇన్‌ఫ్లుయెంజా కేసులు పెరుగుతున్నాయి. ఢిల్లీలో ఈ ఏడాది ఇప్పటివరకు 1,777 హెచ్1ఎన్1 కేసులు నమోదయ్యాయని, కర్ణాటకలో 4,000కుపైగా కేసులు నమోదైనట్లు సమాచారం. 2025–26 సీజన్‌కు భారత్ సిఫారసు చేసిన త్రివాలెంట్ ఫ్లూ వ్యాక్సిన్‌లో హెచ్1ఎన్1, హెచ్3ఎన్2, బీ/విక్టోరియా వైరస్ భాగాలు ఉన్నాయి. ప్రస్తుతం దేశంలో ఉన్న హెచ్1ఎన్1 వైరస్‌లు వ్యాక్సిన్‌ స్ట్రెయిన్‌లకు అనుగుణంగా ఉండటంతో ప్రస్తుత వ్యాక్సిన్లే సరిపోతాయని ఐసీఎంఆర్ స్పష్టం చేసింది. అధిక ప్రమాదం ఉన్నవారు ఏటా ఫ్లూ వ్యాక్సిన్‌ తీసుకోవడాన్ని పరిగణించాలని, తీవ్రమైన లక్షణాలు కనిపిస్తే ఆలస్యం చేయకుండా వైద్య సలహా పొందాలని వైద్య నిపుణులు సూచిస్తున్నారు.

#H1N1 #H1N1Virus #H1N1India #ICMR #Influenza #FluVirus #H1N1Cases #H1N1Vaccine #SeasonalFlu #InfluenzaA #HealthNews #IndiaHealth #VirusUpdate #MedicalNews