ఫిరాయింపు కేసులో అనర్హత తప్పదా ?
దానం నాగేందర్ అనర్హత వ్యవహారం ఇప్పుడు సుప్రీంకోర్టు ముందుకు చేరింది. బీఆర్ఎస్ టికెట్పై ఖైరతాబాద్ ఎమ్మెల్యేగా గెలిచిన దానం 2024లో కాంగ్రెస్లో చేరి, అదే ఏడాది కాంగ్రెస్ అభ్యర్థిగా సికింద్రాబాద్ లోక్సభకు పోటీ చేశారు. దీనిపై తెలంగాణ హైకోర్టు ఆయనను అనర్హుడిగా ప్రకటించింది. ఆ తీర్పును సవాలు చేస్తూ దానం సుప్రీంకోర్టులో SLP దాఖలు చేశారు. తాను బీఆర్ఎస్ నుంచి అధికారికంగా తొలగించబడలేదని, లోక్సభకు మరో పార్టీ తరఫున పోటీ చేసినంత మాత్రాన ఎమ్మెల్యే సభ్యత్వం రద్దు కాదని ఆయన వాదిస్తున్నారు. అయితే హైకోర్టు మాత్రం పార్టీ మార్పు, తదనంతర రాజకీయ చర్యలను పరిగణనలోకి తీసుకుంది.
రాజీనామా చేయకున్నా.. వేటు
ఇక్కడే మహాచంద్ర ప్రసాద్ సింగ్ కేసు కీలకంగా మారుతోంది. సుప్రీంకోర్టు గత తీర్పుల్లో స్పష్టం చేసిన సూత్రం ప్రకారం, పార్టీకి రాతపూర్వకంగా రాజీనామా చేయకపోయినా సభ్యుడి చర్యలు, రాజకీయ ప్రవర్తన ఆధారంగా పార్టీ సభ్యత్వాన్ని స్వచ్ఛందంగా వదిలేశారని నిర్ధారించవచ్చు. అంటే “నేను రాజీనామా చేయలేదు” అనే ఒక్క వాదనతో అనర్హత తప్పించుకోవడం సాధ్యం కాదు. సుప్రీంకోర్టు తీర్పుల్లో ‘స్వచ్ఛందంగా సభ్యత్వాన్ని వదులుకోవడం’కు రాజీనామా ఒక్కటే ప్రమాణం కాదని స్పష్టంగా పేర్కొంది.
ఇక అసలు పోరాటం.. సుప్రీంకోర్టులోనే
పార్టీ ఫిరాయింపు అనర్హత విషయంలో స్పీకర్ నిర్ణయం తీసుకున్నా, ఆ నిర్ణయం పూర్తిగా న్యాయ సమీక్షకు అతీతం కాదు. రాజ్యాంగ ఉల్లంఘన, సహజ న్యాయ సూత్రాల ఉల్లంఘన, స్పష్టమైన తప్పిదాలు వంటి పరిమిత అంశాలపై కోర్టులు జోక్యం చేసుకోవచ్చు. మరోవైపు సుప్రీంకోర్టు గత తీర్పుల ప్రకారం అనర్హత వర్తించే చర్య జరిగిన తేదీ నుంచే దాని ప్రభావాన్ని పరిగణించవచ్చు. అందుకే దానం ప్రస్తుతం చెబుతున్న రాజకీయ వాదనల కంటే ఆయన పార్టీ మారిన తీరు, కాంగ్రెస్ తరఫున లోక్సభకు పోటీ చేసిన అంశం, 10వ షెడ్యూల్ నిబంధనలు సుప్రీంకోర్టు పరిశీలనలో కీలకం కానున్నాయి. తుది నిర్ణయం మాత్రం సుప్రీంకోర్టు విచారణ తర్వాతే స్పష్టమవుతుంది.
#DanamNagender #DanamDisqualification #SupremeCourt #AntiDefectionLaw #TenthSchedule #Khairatabad #TelanganaHighCourt #DefectionCase #BRS #Congress #MahachandraPrasadSingh #Secunderabad #TelanganaPolitics #MLADisqualification #TelanganaNews
