భళా ఇండియా.. అణుశక్తికి అజేయ కవచం!

అంతుచిక్కని అణు త్రిశూలం.

ఆకాశంలో యుద్ధవిమానాలు.. భూమిపై అగ్ని క్షిపణులు.. సముద్ర గర్భంలో అణు జలాంతర్గాములు! శత్రువు ఎక్కడి నుంచి దాడి చేసినా సమాధానం ఇవ్వగల శక్తిని భారత్‌ క్రమంగా నిర్మించుకుంది. తాజాగా బులెటిన్‌ ఆఫ్‌ ది అటామిక్‌ సైంటిస్ట్స్‌ నివేదిక భారత అణు సామర్థ్యంపై ఆసక్తికర అంశాలను వెల్లడించింది. భారత్‌ వద్ద సుమారు 190 అణు వార్‌హెడ్‌లు ఉండొచ్చని అంచనా. వాటిని మోసుకెళ్లే వ్యవస్థల్లో అగ్ని శ్రేణి క్షిపణులు, యుద్ధవిమానాలు, అణు జలాంతర్గాములు కీలక పాత్ర పోషిస్తున్నాయి. అగ్ని-5 దూరప్రాంతాలను చేరగల సామర్థ్యం కలిగి ఉండగా, సముద్రంలో దాగి ఉండే అణు జలాంతర్గాములు రెండో దాడి సామర్థ్యానికి వెన్నెముకగా నిలుస్తున్నాయి. ‘ముందుగా అణుదాడి చేయం’ అన్న విధానాన్ని భారత్‌ కొనసాగిస్తూనే, దాడి జరిగితే భారీ ప్రతిదాడి చేయగల సామర్థ్యాన్ని పటిష్టం చేస్తోంది. ఇదే ఇప్పుడు భారత అణు నిరోధక శక్తికి అసలు బలం.

అణు శక్తికి మూడు రెక్కలు

బులెటిన్‌ ఆఫ్‌ ది అటామిక్‌ సైంటిస్ట్స్‌ తాజా అంచనా ప్రకారం భారత్‌ వద్ద 190 వరకు అణు వార్‌హెడ్‌లు ఉండొచ్చు. వాటిని ప్రయోగించే వ్యవస్థలు మూడు మార్గాల్లో విస్తరించాయి. మిరాజ్‌-2000, జాగ్వార్‌ వంటి యుద్ధవిమానాలు ఒక వైపు, అగ్ని క్షిపణులు మరో వైపు, అణు జలాంతర్గాములు మూడో వైపు నిలిచాయి. ఇదే భారత పూర్తిస్థాయి అణు త్రిశూలంగా నివేదిక పేర్కొంది.

అగ్ని.. భారత వ్యూహాత్మక బలం
భారత్‌ స్వదేశీ సాంకేతికతతో అభివృద్ధి చేసిన అగ్ని శ్రేణి క్షిపణులు వ్యూహాత్మక సామర్థ్యానికి కీలకంగా మారాయి. అగ్ని-1 నుంచి అగ్ని-5 వరకు పలు వ్యవస్థలు సేవల్లో ఉన్నాయి. అగ్ని-5కు దాదాపు 6,000 కిలోమీటర్లలోపు పరిధి ఉందని అంచనా. ఈ క్షిపణి సాంకేతికతలో ఎంఐఆర్‌వీ సామర్థ్యం కూడా కీలక ముందడుగుగా నిలిచింది.

సముద్ర గర్భంలో రెండో దెబ్బ

భారత అణు నిరోధక శక్తిలో జలాంతర్గాముల ప్రాధాన్యం వేగంగా పెరిగింది. ఐఎన్‌ఎస్‌ అరిహంత్‌, ఐఎన్‌ఎస్‌ అరిఘాత్‌, ఐఎన్‌ఎస్‌ అరిధమన్‌తో సముద్ర ఆధారిత సామర్థ్యం బలపడింది. శత్రువు తొలి దాడి చేసినా దాగి ఉన్న అణు జలాంతర్గాముల ద్వారా ప్రతిదాడి చేసే అవకాశం ఉంటుంది. అందుకే భారత్‌ ‘నో ఫస్ట్‌ యూజ్‌’ విధానాన్ని కొనసాగిస్తూ నమ్మకమైన రెండో దాడి సామర్థ్యాన్ని పటిష్టం చేస్తోంది.

#IndiaNuclearPower #NuclearTriad #IndianNuclearArsenal #NuclearDeterrence #AgniMissiles #Agni5 #MIRV #INSArihant #INSArighaat #INSAridhaman #NuclearSubmarines #SecondStrikeCapability #NoFirstUse #StrategicDeterrence #IndiaDefense