H-1Bపై ట్రంప్ మరో భారీ బాంబు లక్ష డాలర్లు దాటిన వీసా ఫీజు

అమెరికాలో ఉద్యోగాలు ఆశిస్తున్న విదేశీ నిపుణులకు ట్రంప్ ప్రభుత్వం మరో భారీ షాక్ ఇచ్చింది. కొత్తగా జారీ చేసే H-1B వీసాలపై 1,03,265 డాలర్ల ఫీజు విధించే ప్రతిపాదిత నిబంధనను ఆగస్టు 24న విడుదల చేసింది. అంటే కొత్త ఫీజు సుమారుగా 90 లక్షల రూపాయలు. భారతీయ ఐటీ నిపుణులు ఎక్కువగా ఆధారపడే H-1B వీసాల ఖర్చు ఒక్కసారిగా భారీగా పెరిగే అవకాశం కనిపిస్తోంది. గతంలో సాధారణంగా ఈ వీసాలకు వివిధ అంశాలను బట్టి సుమారు లక్షన్నర నుంచి నాలుగున్నర లక్షల వరకు మాత్రమే ఫీజులు ఉండేవి.

ఇప్పటికే ట్రంప్‌కు ఎదురుదెబ్బ

ఈ భారీ ఫీజును ట్రంప్ గత ఏడాదే తాత్కాలిక ఉత్తర్వు ద్వారా అమలు చేశారు. అయితే జూన్‌లో ఒక ఫెడరల్ న్యాయమూర్తి ఈ ఫీజు చట్టవిరుద్ధమని తీర్పు ఇచ్చి వసూళ్లను నిలిపివేశారు. ప్రస్తుతం ఆ తీర్పుపై బోస్టన్‌ ఆధారిత అప్పీల్ కోర్టులో విచారణ కొనసాగుతోంది. మరోవైపు అమెరికా వ్యాపార వర్గం దాఖలు చేసిన పిటిషన్‌పై కూడా మరో కోర్టులో విచారణ జరుగుతోంది. సెప్టెంబర్‌లో ప్రస్తుత ఉత్తర్వు గడువు ముగియనున్న నేపథ్యంలో, దాన్ని శాశ్వతం చేసేలా తాజా ప్రతిపాదన తెరపైకి వచ్చింది. అమెరికా హోంల్యాండ్ సెక్యూరిటీ విభాగం ప్రతిపాదించిన ఈ నిబంధన ఫెడరల్ రిజిస్టర్‌లో ఆగస్టు 24న ఆన్‌లైన్‌లో ఉంచారు. ఆగస్టు 25న అధికారికంగా ప్రచురించిన తర్వాత 30 రోజుల పాటు ప్రజలు, సంస్థలు తమ అభిప్రాయాలు, అభ్యంతరాలు తెలియజేయవచ్చు. ఈ ప్రక్రియ పూర్తైన తర్వాత ఏడాది చివరి నాటికి నిబంధనను తుది రూపంలోకి తీసుకురావాలని ప్రభుత్వం భావిస్తోంది. H-1B ద్వారా అమెరికా సంస్థలు ప్రత్యేక నైపుణ్యాలు అవసరమైన ఉద్యోగాల్లో విదేశీ నిపుణులను నియమించుకుంటాయి. ప్రతి ఏడాది 65 వేల సాధారణ వీసాలు, అధిక విద్యార్హత కలిగిన వారికి మరో 20 వేల వీసాలు అందుబాటులో ఉంటాయి.

భారతీయ నిపుణులపై ప్రభావం ఎంత?

H-1B కార్యక్రమంపై ట్రంప్ ప్రభుత్వం కఠిన వైఖరి అవలంబిస్తోంది. అమెరికన్ల ఉద్యోగాలను తక్కువ వేతనాలకు విదేశీ కార్మికులు భర్తీ చేస్తున్నారని ట్రంప్ వర్గం ఆరోపిస్తోంది. అయితే వ్యాపార సంస్థలు మాత్రం నైపుణ్యం కలిగిన అమెరికన్ ఉద్యోగులు అందుబాటులో లేని రంగాల్లో H-1B కీలకమని చెబుతున్నాయి. అమెరికా చాంబర్ ఆఫ్ కామర్స్, డెమొక్రాటిక్ నేతృత్వంలోని రాష్ట్రాలు, కార్మిక సంఘాలు, పలు సంస్థలు భారీ ఫీజును సవాల్ చేస్తున్నాయి. ఈ ఫీజు అధ్యక్షుడి అధికార పరిధిని మించి ఉందని పిటిషనర్లు వాదిస్తున్నారు. మరోవైపు ప్రభుత్వం మాత్రం దేశ ప్రయోజనాల కోసం విదేశీయుల ప్రవేశాన్ని నియంత్రించే అధ్యక్ష అధికారాల్లో ఈ నిర్ణయం భాగమేనని చెబుతోంది. ఇప్పటికే H-1B దరఖాస్తుదారులపై తనిఖీలు పెంచిన ప్రభుత్వం, అధిక నైపుణ్యం, అధిక వేతనం ఉన్న వారికి ప్రాధాన్యం ఇచ్చే కొత్త ఎంపిక విధానాన్ని కూడా ప్రతిపాదించింది. తాజా పరిణామం అమలైతే భారతీయ ఐటీ నిపుణులు, అమెరికా వెళ్లాలనుకునే కొత్త ఉద్యోగార్థులపై ఆర్థిక భారం భారీగా పెరిగే అవకాశం ఉంది.

#H1B #H1BVisa #H1BFee #H1BVisaFee #Trump #DonaldTrump #H1BChanges #H1BFeeIncrease #USImmigration #USVisa #IndianITProfessionals #IndianTechWorkers #ITProfessionals #H1BWorkers #H1BLottery #ForeignWorkers #SkilledWorkers #AmericaVisa #USJobs #TrumpImmigration #ImmigrationNews #USNews #IndiaUSRelations