తెలంగాణలో సర్-2026 డ్రాఫ్ట్ ఓటర్ల జాబితా విడుదలైంది. ఎన్నికల సంఘం వెబ్సైట్లో ఈ జాబితాను అందుబాటులో ఉంచారు. ఓటర్లు తమ పేరు, వయసు, చిరునామా, పోలింగ్ స్టేషన్ వివరాలు సరిగ్గా ఉన్నాయో ఆన్లైన్లోనే తెలుసుకోవచ్చు. ఇందుకోసం ముందుగా ఓటర్ కార్డుపై ఉన్న ఎపిక్ నెంబర్ దగ్గర ఉంచుకోవాలి. ఎన్నికల సంఘం వెబ్సైట్లో ‘సెర్చ్’ ఆప్షన్పై క్లిక్ చేసి తెలంగాణ రాష్ట్రాన్ని ఎంచుకోవాలి. ఎపిక్ నెంబర్, క్యాప్చా నమోదు చేసి సెర్చ్ చేస్తే ఓటర్ వివరాలు కనిపిస్తాయి. ఎపిక్ నెంబర్ లేకపోయినా పేరు, వివరాలు లేదా మొబైల్ నెంబర్తో సెర్చ్ చేసే అవకాశం ఉంది. ఫలితాల్లో పేరు, వయసు, బంధువు పేరు, జిల్లా, అసెంబ్లీ నియోజకవర్గం, పార్ట్ నెంబర్, పార్ట్ సీరియల్ నెంబర్ వంటి వివరాలు కనిపిస్తాయి.
పార్ట్ నెంబర్ ఎలా తెలుసుకోవాలి
డ్రాఫ్ట్ జాబితాలో నేరుగా పేరు వెతకడానికి పార్ట్ నెంబర్, పార్ట్ సీరియల్ నెంబర్ చాలా ఉపయోగపడతాయి. ఈసీఐ వెబ్సైట్లో ఓటర్ వివరాలు సెర్చ్ చేసిన తర్వాత ఈ రెండు నెంబర్లు కనిపిస్తాయి. ఉదాహరణకు మీ పార్ట్ నెంబర్ 234గా ఉంటే, అదే నెంబర్కు సంబంధించిన ప్రాంతాన్ని గుర్తించవచ్చు. తర్వాత ఈసీఐ వెబ్సైట్లోని సర్ -2026 డౌన్ లోడ్ ఆప్షన్ క్లిక్ చేయాలి. రాష్ట్రంగా తెలంగాణ, సంవత్సరం 2026, సర్ డ్రాఫ్ట్ రోల్ – 2026 ఎంచుకోవాలి. తర్వాత జిల్లా, అసెంబ్లీ నియోజకవర్గం, భాషను ఎంపిక చేయాలి. సంబంధిత పార్ట్ నెంబర్లు, పార్ట్ పేర్లు కనిపిస్తాయి. మీ పార్ట్ నెంబర్ను ఎంచుకుని క్యాప్చా నమోదు చేస్తే డ్రాఫ్ట్ ఓటర్ల జాబితా పీడీఎఫ్ డౌన్లోడ్ చేసుకోవచ్చు.
పార్ట్ సీరియల్ నెంబర్తో గుర్తింపు
డౌన్లోడ్ చేసిన పీడీఎఫ్లో ఓటర్ల వివరాలు సీరియల్ నెంబర్ ప్రకారం ఉంటాయి. మీ పార్ట్ సీరియల్ నెంబర్ 108 అయితే పీడీఎఫ్లో 108వ సీరియల్ వద్ద మీ వివరాలు ఉంటాయి. అక్కడ మీ పేరు, వయసు, బంధువు పేరు వంటి వివరాలను పరిశీలించాలి. పేరు, ఇతర వివరాల్లో తప్పులు ఉన్నాయా కూడా తప్పనిసరిగా చూడాలి. అయితే ఒక ముఖ్యమైన విషయం గుర్తుంచుకోవాలి. ఎన్యూమరేషన్ ఫారం సమర్పించిన ఓటర్ల వివరాలు మాత్రమే సర్ డ్రాఫ్ట్ జాబితాలో కనిపిస్తాయి. అందువల్ల పేరు కనిపించకపోతే కారణాన్ని తెలుసుకోవడం ముఖ్యం. సర్ ప్రక్రియలో మీ ఓటు హక్కు సురక్షితంగా ఉందో లేదో తెలుసుకోవడానికి డ్రాఫ్ట్ జాబితాను ప్రతి ఓటరూ ఒకసారి పరిశీలించడం మంచిది.
#Telangana #SIR2026 #VoterList #DraftVoterList #TelanganaVoters #ElectionCommission #ECI #VoterID #EPICNumber #VoterVerification #VoterRights #TelanganaElections #ElectoralRoll #VoterSearch #PollingStation #SIRDraftRoll #TelanganaNews #ElectionNews #VoterList2026 #CheckVoterName
