గెలిచేదెవరో నిర్ణయించే శక్తి వాళ్లేనన్న కేటీఆర్
వచ్చే ఎన్నికల్లో 50 శాతానికి పైగా జెన్జీ యువత ఓటు హక్కు వినియోగించబోతున్నారని బీఆర్ఎస్ కార్యనిర్వాహక అధ్యక్షుడు కేటీఆర్ అన్నారు. యువత ఆలోచనా విధానం పూర్తిగా మారిందని, రాజకీయ పార్టీలు కూడా ఆ మార్పును అర్థం చేసుకోవాల్సిన అవసరం ఉందన్నారు. ఢిల్లీలో ఇటీవల జరిగిన యువత ఆందోళనలు కొత్త తరం శక్తికి నిదర్శనమని వ్యాఖ్యానించారు. ప్రధాని నరేంద్ర మోదీ ఎవరితో పెట్టుకోవద్దో వారితోనే పెట్టుకున్నారని విమర్శించారు.
సోషల్ మీడియా శక్తిని గుర్తించాలి
18 నుంచి 24 ఏళ్ల మధ్య వయసున్న యువత పత్రికలు, టెలివిజన్ కంటే సోషల్ మీడియా, రీల్స్ ద్వారానే వార్తలు తెలుసుకుంటోందని కేటీఆర్ చెప్పారు. “వాట్సాప్ అంకుల్స్… ఇన్స్టా పిల్లలు” మధ్య జరిగిన పోరాటంలో మొదటి రౌండ్ ఎవరు గెలిచారో దేశం చూసిందన్నారు. యువత స్పందన తర్వాతే ప్రధాని అర్థరాత్రి ఇన్స్టాగ్రామ్లో వీడియో విడుదల చేయాల్సి వచ్చిందని వ్యాఖ్యానించారు. సోషల్ మీడియా లేకపోతే ప్రభుత్వాల్లో జవాబుదారీతనం వచ్చేది కాదని అభిప్రాయపడ్డారు.
పరిశోధనాత్మక జర్నలిజంపై ప్రశ్నలు
నవతెలంగాణ దినపత్రిక వార్షికోత్సవ సెమినార్లో మాట్లాడిన కేటీఆర్, పలు కీలక ఘటనలకు ప్రధాన మీడియా తగిన ప్రాధాన్యం ఇవ్వలేదని విమర్శించారు. బాధితులు ఫిర్యాదు చేసినా కొన్ని సంఘటనలు సోషల్ మీడియా ద్వారా మాత్రమే వెలుగులోకి వచ్చాయని అన్నారు. హైదరాబాద్ సెంట్రల్ యూనివర్సిటీ భూముల అంశం, గిరిజనులపై జరిగిన ఘటనలు కూడా విద్యార్థులు ఉద్యమించిన తర్వాతే చర్చకు వచ్చాయని పేర్కొన్నారు. పరిశోధనాత్మక జర్నలిజం గతంలో ఉన్న స్థాయిలో కనిపించడం లేదని వ్యాఖ్యానించారు.
స్వేచ్ఛకు అడ్డుకట్ట వద్దు
ప్రభుత్వాలు వాక్ స్వాతంత్ర్యానికి పరిమితులు విధించకూడదని కేటీఆర్ అన్నారు. స్వేచ్ఛ అంటే దూషణలు కాదని, వాస్తవాలను నిర్భయంగా చెప్పే హక్కు అని స్పష్టం చేశారు. సంప్రదాయ మీడియాపై ఒత్తిళ్లు పెరిగినా సోషల్ మీడియా ప్రజలకు ప్రత్యామ్నాయ వేదికగా మారిందని చెప్పారు. రాబోయే ఎన్నికల్లో జెన్జీ ఓటర్లే రాజకీయాల దిశను నిర్ణయించే ప్రధాన శక్తిగా నిలుస్తారని కేటీఆర్ అభిప్రాయపడ్డారు.
#KTR #KalvakuntlaTarakaRamaRao #BRS #GenZ #GenZVoters #YouthVoters #TelanganaPolitics #TelanganaElections #YouthPolitics #SocialMediaPolitics #Instagram #PoliticalNews #KTRNews #BRSNews #NextElections #YouthPower #Voters #IndianPolitics #SocialMedia #PoliticalAccountability
