బీజేపీ నెక్స్ట్ టార్గెట్ తెలంగాణ .
లోక్‌భవన్ ముట్టడించిన కాంగ్రెస్ .
సీఈసీ రాజీనామాకు నేతల డిమాండ్.
పీసీసీ చీఫ్ మహేశ్ కుమార్ గౌడ్ ఆరోపణలు .
ఓటర్ల జాబితా సవరణలో అక్రమాలు జరుగుతున్నాయంటూ తెలంగాణ కాంగ్రెస్ చేపట్టిన చలో లోక్‌భవన్ ముట్టడి తీవ్ర ఉద్రిక్తతకు దారితీసింది. సీఈసీ జ్ఞానేశ్ కుమార్ రాజీనామా చేయాలని డిమాండ్ చేస్తూ ఇండియా కూటమి నేతలు, కాంగ్రెస్ కార్యకర్తలు భారీ ర్యాలీ నిర్వహించారు. నెక్లెస్ రోడ్డులోని ఇందిరాగాంధీ విగ్రహం వద్ద ప్రారంభమైన ప్రదర్శన లోక్‌భవన్ వైపు సాగింది. వందలాది మంది ముట్టడికి ప్రయత్నించడంతో పోలీసులు అడ్డుకున్నారు. టీపీసీసీ అధ్యక్షుడు మహేష్ కుమార్ గౌడ్, మంత్రులు పొన్నం ప్రభాకర్, శ్రీధర్ బాబు, పొంగులేటి శ్రీనివాస్ రెడ్డి, అడ్లూరి లక్ష్మణ్ కుమార్, వాకిటి శ్రీహరి, కాంగ్రెస్ నేత మహమ్మద్ అజారుద్దీన్‌ను పోలీసులు అరెస్ట్ చేసి పంజాగుట్ట పోలీస్ స్టేషన్‌కు తరలించారు.
ఓట్ల తొలగింపుపై ఆరోపణలు
అరెస్టు అనంతరం కాంగ్రెస్ నేతలు కేంద్ర ప్రభుత్వం, ఎన్నికల సంఘంపై తీవ్ర విమర్శలు చేశారు. బిహార్, పశ్చిమ బెంగాల్ తర్వాత తెలంగాణను కూడా బీజేపీ ప్రభుత్వం లక్ష్యంగా చేసుకుంటోందని మహేష్ కుమార్ గౌడ్ ఆరోపించారు. బీఆర్ఎస్‌తో బీజేపీ కుమ్మక్కై 92 లక్షల ఓట్లను తొలగించిందని ఆయన ఆరోపించారు. సీఈసీ జ్ఞానేశ్ కుమార్ వెంటనే రాజీనామా చేయాలని, ఆయనను పదవి నుంచి తొలగించే వరకు ఉద్యమం కొనసాగుతుందని స్పష్టం చేశారు. మంత్రి పొన్నం ప్రభాకర్ మాట్లాడుతూ ఓటు హక్కు ప్రజాస్వామ్యానికి మూలస్తంభమని, ఓటర్ల జాబితా సవరణపై ప్రజల్లో అనుమానాలు నెలకొన్నాయని అన్నారు. పారదర్శక ఎన్నికల వ్యవస్థ కోసం తమ పోరాటం కొనసాగుతుందని కాంగ్రెస్ తేల్చిచెప్పింది. ఢిల్లీలో రాహుల్ గాంధీ, ప్రియాంక గాంధీ సహా విపక్ష నేతల అరెస్టులను కూడా కాంగ్రెస్ నేతలు ఖండించారు. రాజ్‌భవన్, లోక్‌భవన్ పరిసరాల్లో పోలీసులు భారీ భద్రత ఏర్పాటు చేశారు.
#TelanganaCongress #MaheshKumarGoud #LokBhavan #VoterListRevision #VoterRights #GyaneshKumar #CEC #BJP #BRS #PonnamPrabhakar #CongressProtest #TelanganaPolitics #IndiaNews
