తాగునీరు, విద్యుత్‌‌పై కీలక చర్యలు.
హైదరాబాద్‌లో నిర్మాణ పనుల కోసం కొత్త బోరుబావుల తవ్వకాలకు అనుమతులు ఇవ్వొద్దని రాష్ట్ర ప్రభుత్వ ప్రధాన కార్యదర్శి సంజయ్‌ జాజు స్పష్టం చేశారు. ఎల్‌నినో ప్రభావంతో తాగునీరు, విద్యుత్‌ కొరత తలెత్తకుండా జిల్లా, మండల స్థాయిలో ప్రత్యామ్నాయ ప్రణాళికలు సిద్ధం చేయాలని అధికారులను ఆదేశించారు. సోమవారం ఉమ్మడి జిల్లాల ప్రత్యేక అధికారులతో నిర్వహించిన వీడియో కాన్ఫరెన్స్‌లో పరిస్థితులను సమీక్షించారు. హైదరాబాద్‌లో తాగునీటి అవసరాలకు మాత్రమే నిబంధనల ప్రకారం బోర్ల తవ్వకాలకు అనుమతించాలని, ప్రస్తుతం ఉన్న బోర్లను మరింత లోతుగా తవ్వేందుకు అవకాశం కల్పిస్తున్నట్లు అధికారులు తెలిపారు. నల్లాలకు అక్రమంగా మోటార్లు బిగించి నీటిని తోడుతున్న వారిపై ప్రత్యేక చర్యలు చేపడుతున్నారు.
విద్యుత్‌ పొదుపు.. ఉత్పత్తిపై ప్రత్యేక దృష్టి
రాష్ట్రంలో విద్యుత్‌ ఉత్పత్తి ఆశించిన స్థాయిలో లేకున్నా వ్యవసాయ, గృహ అవసరాలకు సరఫరా చేస్తున్నామని సీఎస్‌ తెలిపారు. పరిశ్రమలకు విద్యుత్‌ కోతలు విధించడం లేదని స్పష్టం చేశారు. ప్రభుత్వ కార్యాలయాల్లో విద్యుత్‌ పొదుపు పాటించాలని, పగటిపూట అత్యవసర పరిస్థితుల్లో ఏసీలను 25 డిగ్రీల వద్ద వినియోగించాలని సూచించారు. సాయంత్రం ఆరు గంటల తర్వాత ఏసీల వాడకాన్ని తగ్గించాలని ఆదేశించారు. థర్మల్‌ విద్యుత్‌ కేంద్రాల్లో గరిష్ఠ ఉత్పత్తికి చర్యలు తీసుకోవాలని, యాదాద్రి థర్మల్‌ కేంద్రంపై ప్రత్యేక అధికారులు దృష్టి పెట్టాలని సూచించారు. ఎల్‌నినో ప్రభావంపై త్వరలో అఖిలపక్ష, కేబినెట్‌ సబ్‌కమిటీ సమావేశాలు నిర్వహించనున్నారు.
జలాశయాలపై ఒత్తిడి.. ప్రత్యామ్నాయ ఏర్పాట్లు
మంజీరా, సింగూరు నుంచి నీటి సరఫరా లేకపోవడంతో ప్రత్యామ్నాయ మార్గాల ద్వారా హైదరాబాద్‌కు నీటిని అందిస్తున్నట్లు అధికారులు వివరించారు. మిషన్‌ భగీరథ నుంచి 60 ఎంజీడీల నీటిని వినియోగిస్తున్నట్లు తెలిపారు. నవంబరు 1 నుంచి నిర్మాణ పనులకు శుద్ధి చేసిన మురుగునీటిని గ్రీన్‌ ట్యాంకర్ల ద్వారా అందించనున్నారు. రంగారెడ్డి జిల్లాలో భూగర్భ జలాలు తగ్గుతున్న నేపథ్యంలో ప్రత్యామ్నాయ ఏర్పాట్లు చేస్తున్నారు. ఖమ్మం, మహబూబాబాద్‌, సూర్యాపేట జిల్లాలకు జూన్‌ వరకు నీరందించాలంటే పాలేరు జలాశయంలో నాలుగు టీఎంసీలు అవసరం కాగా, ప్రస్తుతం రెండు టీఎంసీలే ఉన్నాయని అధికారులు తెలిపారు.
#Hyderabad #BorewellRestrictions #ElNino #TelanganaGovernment #SanjayJaju #WaterShortage #Groundwater #WaterConservation #PowerConservation #MissionBhagiratha #YadadriThermalPlant #TelanganaNews
