అత్యాచార నిందితుల సమర్థకుడు విద్యాశాఖ మంత్రా? రాహుల్ ధ్వజం

కొత్త మంత్రిపై దాడి పెంచిన కాంగ్రెస్.

కేంద్ర విద్యాశాఖ మంత్రిగా ప్రహ్లాద్ జోషీకి అదనపు బాధ్యతలు అప్పగించడంపై లోక్‌సభ ప్రతిపక్ష నేత రాహుల్ గాంధీ తీవ్ర విమర్శలు చేశారు. ధర్మేంద్ర ప్రధాన్ రాజీనామా తర్వాత దేశంలో ఎంతో మంది సీనియర్ మంత్రులు ఉన్నప్పటికీ, అత్యాచార నిందితులకు మద్దతు తెలిపిన వ్యక్తికే బాధ్యతలు అప్పగించడం ఆశ్చర్యంగా ఉందని అన్నారు. అలాంటి వ్యక్తిపై బీజేపీ నమ్మకం ఉంచడం దేశానికి తప్పుడు సందేశం పంపుతుందని విమర్శించారు.

బిల్కిస్ బానో కేసును ప్రస్తావించిన రాహుల్

2002 గుజరాత్ అల్లర్ల సమయంలో బిల్కిస్ బానోపై సామూహిక అత్యాచారం చేసిన కేసులో జీవిత ఖైదు అనుభవిస్తున్న 11 మందిని ముందుగానే విడుదల చేసిన నిర్ణయాన్ని అప్పట్లో ప్రహ్లాద్ జోషీ సమర్థించిన విషయాన్ని రాహుల్ గాంధీ గుర్తు చేశారు. శిక్ష అనుభవించిన తర్వాత విడుదలకు చట్టంలో అవకాశం ఉందని జోషీ చెప్పిన వ్యాఖ్యలను ఆయన ప్రస్తావించారు. నిందితుల మంచి ప్రవర్తనను కూడా విడుదలకు కారణంగా చెప్పడం తీవ్ర అభ్యంతరకరమని కాంగ్రెస్ విమర్శించింది. బిల్కిస్ బానో కేసులో నిందితుల విడుదలను 2024లో సుప్రీంకోర్టు రద్దు చేసింది. విడుదల ఉత్తర్వులు చట్టబద్ధ అధికార పరిధిలో జారీ కాలేదని అత్యున్నత న్యాయస్థానం స్పష్టం చేసింది. అలాంటి నిర్ణయాన్ని సమర్థించిన వ్యక్తికే ఇప్పుడు విద్యాశాఖ బాధ్యతలు ఇవ్వడం సరైన సందేశం కాదని రాహుల్ గాంధీ ప్రశ్నించారు.

విద్యార్థుల ఉద్యమాలపై వ్యాఖ్యలు

పేపర్ లీకుల వ్యవహారంపై దేశవ్యాప్తంగా యువత, విద్యార్థులు పెద్ద ఎత్తున నిరసనలు చేపట్టారని రాహుల్ గుర్తు చేశారు. ఆందోళనల్లో విద్యార్థినులు కూడా పాల్గొన్నారని, పలువురు పోలీసుల చర్యలకు గురయ్యారని అన్నారు. అలాంటి సమయంలో విద్యార్థుల సమస్యలను అర్థం చేసుకునే వ్యక్తిని నియమించాల్సింది పోయి వివాదాస్పద వ్యాఖ్యలు చేసిన నేతకు బాధ్యతలు ఇవ్వడం ఆశ్చర్యకరమని విమర్శించారు.

ప్రియాంక కూడా ఘాటు విమర్శలు

ఎంపీ ప్రియాంక గాంధీ కూడా ఇదే అంశాన్ని ప్రస్తావించారు. గర్భిణిపై అత్యాచారం చేసిన నిందితుల విడుదలకు మద్దతుగా మాట్లాడిన వ్యక్తిని విద్యాశాఖ మంత్రిగా నియమించడం ద్వారా దేశంలోని కోట్లాది బాలికలకు ప్రధాని నరేంద్ర మోదీ ఏ సందేశం ఇస్తున్నారని ప్రశ్నించారు. ఈ నిర్ణయం మహిళల భద్రతపై కేంద్ర ప్రభుత్వ వైఖరిపై సందేహాలు పెంచుతోందని అన్నారు. ధర్మేంద్ర ప్రధాన్ రాజీనామాతో, కేంద్ర ప్రభుత్వం ప్రహ్లాద్ జోషీకి విద్యాశాఖ అదనపు బాధ్యతలు అప్పగించింది. ఈ నిర్ణయాన్ని కాంగ్రెస్ తీవ్రంగా వ్యతిరేకిస్తుండగా, బీజేపీ మాత్రం ప్రభుత్వ నిర్ణయాన్ని సమర్థిస్తోంది.