రవీంద్రభారతిలో బతుకమ్మ సంబరాలు.
సంప్రదాయాల నడుమ ఎంగిలిపూల బతుకమ్మ.
తెలంగాణ సంస్కృతి, సంప్రదాయాలకు ప్రతీకగా నిలిచే బతుకమ్మ సంబరాలు హైదరాబాద్‌లోని రవీంద్రభారతిలో శనివారం అట్టహాసంగా ప్రారంభమయ్యాయి. భాషా సాంస్కృతిక శాఖ ఆధ్వర్యంలో నిర్వహించిన ఎంగిలిపూల బతుకమ్మ వేడుకలకు వందలాది మంది మహిళలు హాజరయ్యారు. రంగురంగుల పూలతో బతుకమ్మలను పేర్చి, సంప్రదాయ పాటలు పాడుతూ ఉత్సాహంగా వేడుకల్లో పాల్గొన్నారు. బతుకమ్మ పాటలతో రవీంద్రభారతి ప్రాంగణం సందడిగా మారింది. ఈ కార్యక్రమానికి మంత్రులు పొన్నం ప్రభాకర్‌, జూపల్లి కృష్ణారావు ముఖ్య అతిథులుగా హాజరై వేడుకలను ప్రారంభించారు. తెలంగాణ ఆడపడుచులందరికీ మంత్రులు బతుకమ్మ పండుగ శుభాకాంక్షలు తెలిపారు.
మహిళల అభివృద్ధితో తెలంగాణకు సుభిక్షం
ఈ సందర్భంగా పొన్నం ప్రభాకర్‌ మాట్లాడుతూ ప్రకృతి ప్రసాదించిన పూలను దేవతగా కొలిచే అపురూపమైన పండుగ బతుకమ్మ అని పేర్కొన్నారు. తెలంగాణ ప్రజల సామూహిక జీవన విధానానికి, కష్టసుఖాలను కలిసి పంచుకునే ఐక్యతా భావానికి ఈ పండుగ ప్రతీకగా నిలుస్తుందని తెలిపారు. రాష్ట్ర ప్రజల జీవితాల్లో సంతోషం నిండాలని, ప్రతి ఒక్కరూ ఆరోగ్యంగా, ఆనందంగా ఉండాలని ఆకాంక్షించారు. తెలంగాణ సుభిక్షంగా వర్ధిల్లాలని, మహిళలు అన్ని రంగాల్లో అభివృద్ధి సాధించాలని కోరారు. మహిళలు ఆర్థికంగా మరింత బలోపేతం కావాలని, రాష్ట్రంలో సంతోషకరమైన వాతావరణం నెలకొనాలని మంత్రులు ఆకాంక్షించారు.
#Bathukamma #TelanganaBathukamma #EngiliPulaBathukamma #RavindraBharathi #HyderabadEvents #TelanganaCulture #TelanganaTraditions #PonnamPrabhakar #JupallyKrishnaRao #FlowerFestival #WomenEmpowerment #TelanganaNews
