వచ్చేది కేసీఆరే ఢిల్లీలో మనమే కీలకం

కాంగ్రెస్ పాలనపై ప్రజల్లో ఆగ్రహం.
రేవంత్ సర్కారుపై కేటీఆర్ ఎదురుదాడి .

తెలంగాణలో కాంగ్రెస్ ప్రభుత్వంపై ప్రజలు తీవ్ర అసంతృప్తితో ఉన్నారని బీఆర్ఎస్ వర్కింగ్ ప్రెసిడెంట్ కేటీఆర్ అన్నారు. తెలంగాణ భవన్‌లో జరిగిన అంబర్‌పేట బీఆర్ఎస్ కార్యకర్తల సమావేశంలో మాట్లాడుతూ, గత ఎన్నికల్లో హైదరాబాద్‌లో కాంగ్రెస్ ఒక్క సీటు కూడా గెలవలేదని గుర్తుచేశారు. తప్పుడు ప్రచారంతో అధికారంలోకి వచ్చిందని ఆరోపించారు. రాష్ట్రంలో విద్యుత్ సమస్యలు, తాగునీటి ఇబ్బందులు పెరిగాయని, రైతులు తీవ్ర కష్టాలు ఎదుర్కొంటున్నారని విమర్శించారు. అన్ని వర్గాలను కాంగ్రెస్ ప్రభుత్వం మోసం చేసిందని, పరిపాలనలో విఫలమైందని మండిపడ్డారు.

కరువు నివారణలో ముందస్తు చర్యలేవి?

ఎల్‌నినో ప్రభావంపై పది నెలల ముందే ప్రభుత్వాన్ని అప్రమత్తం చేసినా రేవంత్ రెడ్డి తగిన చర్యలు తీసుకోలేదని కేటీఆర్ ఆరోపించారు. ఇతర రాష్ట్రాలు ముందస్తు జాగ్రత్తలు తీసుకుని ప్రాజెక్టుల్లో నీటిని నిల్వ చేసుకున్నాయని, తెలంగాణలో మాత్రం ఆ ప్రయత్నాలు జరగలేదని విమర్శించారు. కాళేశ్వరం పంపులు ప్రారంభిస్తే కేసీఆర్‌కు పేరు వస్తుందనే ఉద్దేశంతోనే వాటిని వినియోగించలేదని ఆరోపించారు. మేడిగడ్డ విషయంలో కాంగ్రెస్ తప్పుడు ప్రచారం చేసిందని, రాహుల్ గాంధీతోనూ ఆరోపణలు చేయించిందని విమర్శించారు. కాంగ్రెస్ ప్రచారాన్ని ప్రజలు నమ్మరని అన్నారు.

కేసీఆర్ మళ్లీ ముఖ్యమంత్రి అవుతారు

తెలంగాణలో లూటీ పాలన సాగుతోందని కేటీఆర్ ఆరోపించారు. కాంగ్రెస్, బీజేపీ నేతలు కేసీఆర్‌ను విమర్శించే విషయంలో ఒక్కటవుతున్నారని వ్యాఖ్యానించారు. రాష్ట్ర ప్రయోజనాల కోసం పనిచేయాల్సిన ఎంపీలు కేసీఆర్, కేటీఆర్‌లను విమర్శించడానికే ప్రాధాన్యం ఇస్తున్నారని అన్నారు. మరో ఏడాది తర్వాత రాజకీయ పరిస్థితులు మారతాయని, కేసీఆర్ తిరిగి ముఖ్యమంత్రి కావడం ఖాయమని ధీమా వ్యక్తం చేశారు. కాంగ్రెస్‌పై నమ్మకం కోల్పోయిన వర్గాలు బీఆర్ఎస్ వైపు చూస్తున్నాయని పేర్కొన్నారు. రాబోయే స్థానిక సంస్థల ఎన్నికల్లో పార్టీ కార్యకర్తలు సమష్టిగా పనిచేయాలని పిలుపునిచ్చారు.

జాతీయ రాజకీయాల్లో కేసీఆర్ పాత్రపై ధీమా

దేశంలో కాంగ్రెస్, బీజేపీయేతర రాజకీయ శక్తులకు భవిష్యత్తులో ప్రాధాన్యం పెరుగుతుందని కేటీఆర్ అన్నారు. జాతీయ స్థాయిలో ప్రత్యామ్నాయ కూటమి అవసరమని కేసీఆర్ గతంలో చెప్పినప్పుడు చాలామందికి అర్థం కాలేదని, ఇప్పుడు ఆ ఆలోచన ప్రాధాన్యం సంతరించుకుంటోందని వ్యాఖ్యానించారు. బీజేపీ యువత నుంచి సవాళ్లు ఎదుర్కొంటోందని అన్నారు. తెలంగాణలో ఎంపీటీసీ, జెడ్పీటీసీ, కార్పొరేషన్ ఎన్నికలు నిర్వహించే ధైర్యం కాంగ్రెస్‌కు లేదని విమర్శించారు. గ్రాడ్యుయేట్ ఎమ్మెల్సీ ఎన్నికల్లో ఓటర్ల నమోదు నుంచి ప్రచారం వరకు కార్యకర్తలు సమన్వయంతో పనిచేయాలని సూచించారు. నిరుద్యోగులు, యువతకు ఇచ్చిన హామీలను కాంగ్రెస్ నెరవేర్చలేదని, పట్టభద్రుల ఎన్నికల్లో ఆ పార్టీకి తగిన సమాధానం చెబుతారని కేటీఆర్ వ్యాఖ్యానించారు.

#KTR #KCR #RevanthReddy #BRS #TelanganaPolitics #KCRComeback #CongressGovernment #KaleshwaramProject #Medigadda #TelanganaDrought #LocalBodyElections #MLCElections #PoliticalNews