మాఇంటి బంగారం
మూడేళ్ల విరామం తర్వాత సమంత చేసిన సినిమా ’మా ఇంటి బంగారం’. దాంతో ఈ సినిమాపై అంచనాలు మొదట్నుంచీ భారీగానే ఉన్నాయి. పైగా ’ఓ బేబీ’ తర్వాత నందినీరెడ్డి, సమంత కాంబినేషన్లో వస్తున్న సినిమా కావడంతో సినిమాపై ఆసక్తి జనాల్లో మెండుగానే ఉన్నది. ఈ సినిమాలో సమంత తొలిసారి యాక్షన్ రోల్ పోషించారు. ప్రచార చిత్రాలకూ, పాటలకు కూడా మంచి స్పందన రావడంతో ఈ సినిమాపై భారీ అంచనాలు నెలకొన్నాయి. ప్రేమ వివాహం చేసుకొని, ఓ సంప్రదాయ కుటుంబంలోకి పెద్ద కోడలుగా ఎంట్రీ ఇస్తుంది స్వర్ణ(సమంత). ఇంట్లోకి వచ్చిన నాటి నుంచి అప్పటికే ఇంట్లో ఉన్న చిన్నకోడలు అనసూయ(శ్రీముఖి)తో పోలుస్తూ అంతా ఆమెను చూస్తుంటారు. అనసూయ ఇంటిని చక్కదిద్దటంలో దిట్ట. కానీ స్వర్ణకు మాత్రం ఆ ఇంటి విషయాలు ఏమీ తెలియవు. కానీ ఎలాగైనా పెద్ద కోడలుగా తన స్థానాన్ని సుస్థిరం చేసుకునేందుకు ప్రయత్నాలు మొదలుపెడుతుంది. దీనికి తన చిన్ననాటి స్నేహితురాలు ఆమెకు సహాయం చేస్తుంటుంది. ఈ విధంగా సరదాగా కథ సాగుతూవుంటుంది. మరోవైపు నక్సలైట్ ముసుగులో దుర్మార్గాలకు తెగబడే నీచుడైన గుల్షన్ దేవయ్య జైల్లో శిక్ష అనుభవిస్తుంటాడు. తనకు అనుచరుడి ద్వారా తన సహ నక్సలైట్ అయిన ఝాన్సీ ఆచూకీ తెలుస్తుంది. ఆ ఝాన్సీనే స్వర్ణగా పేరు మార్చుకొని బతుకుతున్నదని తెలుసుకున్న గుల్షన్ దేవయ్య, ఎలాగైనా ఝాన్సీని దక్కించుకునేందుకు జైలు నుంచి పారిపోయి వస్తాడు. ఝాన్సీ వేరే వ్యక్తిని పెళ్లాడిందని తెలుసుకొని రగిలిపోతాడు. ఎలాగైనా ఝాన్సీని, ఆమె కుటుంబాన్నీ నాశనం చేయాలనుకుంటాడు. మరి స్వర్ణ రూపంలో ఉన్న ఝాన్సీ తన కుటుంబాన్ని ఎలా కాపాడుకున్నది? అసలు స్వర్ణలా ఝాన్సీ ఎందుకు మారింది? ఈ స్వర్ణ ఎవరు? ఆమె కథేంటి? ఈ ప్రశ్నలకు సమాధానమే మిగతా కథ. కొంచెం రొటీన్ కథే అయినా ’మా ఇంటి బంగారం’ విషయంలో కొత్తగా కనిపించిన విషయం ఏంటంటే.. ఇది లేడీ ఓరియెంటెడ్ స్జబెక్ట్ కావడమే. ఈ తరహా కథ ఓ హీరోయిన్ చేయడం మాత్రం కొత్తగా ఉన్నది. ఫస్టాఫ్ సినిమా చూస్తున్నంతసేపూ మహేశ్బాబు ’అతడు’ సినిమా గుర్తొస్తుంది. అందులో మహేశ్ కిరాయి హంతకుడు. ఇందులో సమంత నక్సలైట్. అంతే తేడా. కథ పాతదైనా దాన్ని కొత్తగా చెబితే సినిమా హిట్టే. ఈ విషయంలో దర్శకురాలు నందినిరెడ్డి సక్సెస్ అయ్యిందనే చెప్పాలి. ప్రథమార్థంతో సమంతను కుటుంబ స్త్రీగా చూపించిన తీరు, అక్కడ్నుంచీ నిదానంగా ఆమె ట్రాన్స్ఫర్మేషన్.. సమంతతో చేయించిన పోరాటాలు, ఈ నేపథ్యంలో వచ్చే ఉత్కంఠభరితమైన సన్నివేశాలు మాస్ ఆడియన్స్కి బాగా పట్టేస్తాయి. ఫస్ట్హాఫ్లో ఇంట్లో జరిగే కామెడీ సన్నివేశాలు, కారు ఛేజింగ్ సీక్వెన్స్ చాలా బావున్నాయి. ఇక సెకండాఫ్లో కథ కాస్త స్లో అయినట్టు అనిపిస్తుంది. తనెవరో తన ఇంట్లో అందరికీ రివీల్ చేసే క్రమంలో కాస్త కథ నిదానించిన ఫీలింగ్ కలుగుతుంది. హీరోలకు ఏ మాత్రం తీసిపోకుండా అద్భుతమైన పోరాటలు చేసి శభాష్ అనిపించుకున్నది సమంత. ఈ సినిమాలో ఝాన్సీగా, స్వర్ణగా రెండు షేడ్స్ని అద్భుతంగా పోషించింది. తనదైన శైలిలో కామెడీ కూడా పండించింది. స్త్రీ అంటే ఇలా ఉండాలి..’ అనిపించేలా ఆమె పాత్ర సాగింది. సమంత తర్వాత ఈ సినిమాలో చెప్ప్పుకోవాల్సిన పాత్ర గుల్షన్ దేవయ్యదే. తన విలనీ అదిరిపోయింది. చెడ్డ లక్షణాలున్న నక్సలైట్ నాయకుడిగా తను ఒదిగిపోయి అభినయించాడు. ఇక మిగతా వారంతా కూడా పరిధిమేర తమ పాత్రలను రక్తికట్టించారు. రాజ్ నిడిమోరు పాత కథే రాసినా.. డైరెక్టర్ నందినీరెడ్డి కొత్త ట్రీట్ చేసి, జనరంజకంగా సినిమాను తెరకెక్కించింది. సెకండాఫ్ విషయంలో కాస్తంత శ్రద్ధ పెడితే బావుండేది. సంతోష్ నారాయణ సంగీతం సినిమాకు పెద్ద ఎస్సెట్. నేపథ్య సంగీతం బావుంది. ఓం ప్రకాశ్ కెమెరా పనితనం అభినందనీయంగా ఉంది. మొత్తంగా లేడీ ప్రేక్షకులు, సమంత అభిమానులు గర్వపడేలా, మాస్ ప్రేక్షకులకు నచ్చేలా, ఫ్యామిలీ ఆడియన్స్ మెచ్చేలా సినిమా ఉన్నదని చెప్పొచ్చు.
#MaaIntiBangaram #Samantha #SamanthaRuthPrabhu #NandiniReddy #TeluguCinema #Tollywood #LadyOrientedMovie #ActionDrama #SamanthaMovie #MaaIntiBangaramReview #MovieReview #GulshanDevaiah #Sreemukhi #RajNidimoru #SantoshNarayanan #FamilyDrama #MassEntertainment #TollywoodReview #CinemaReview #MovieUpdate #FilmReview #SamanthaFans #TeluguMovieReview #FamilyAudience #ActionThriller #WomenCentricFilm #SouthCinema #EntertainmentNews #MovieBuzz #BlockbusterTalk
