ఒకప్పుడు ఉద్యోగ విరమణ తర్వాత జీవితం అంటే చాలా మందికి ఒకే ఒక ఆలోచన ఉండేది. నగరాల్లో కష్టపడి సంపాదించి, రిటైర్ అయ్యాక ప్రశాంతత కోసం సొంత ఊర్లకు వెళ్లిపోయేవారు. కుటుంబ సభ్యులతో గడపడమే పరమావధిగా భావించేవారు. కానీ ఇప్పుడు కాలం మారుతోంది. నేటి తరం సీనియర్ సిటిజన్లు కేవలం ఇళ్లకే పరిమితం కావాలని అనుకోవడం లేదు. వారు క్లబ్బులు, జిమ్లు, స్నేహితులు, మెరుగైన వైద్య సదుపాయాలు ఉన్న ఆధునిక వసతులతో కూడిన సమాజాన్ని కోరుకుంటున్నారు.
ఆదర్శంగా దక్షిణాది, భారీగా పెరుగుతున్న మార్కెట్ విలువ
భారతదేశంలో వృద్ధుల జీవన శైలిలో వస్తున్న మార్పులు రియల్ ఎస్టేట్ రంగానికి కొత్త ఊపును ఇస్తున్నాయి. 2025 నాటికి భారతదేశ సీనియర్ లివింగ్ మార్కెట్ విలువ 3.55 బిలియన్ డాలర్లుగా ఉంది. ఇది 2026 నాటికి 4.47 బిలియన్ డాలర్లకు, 2031 నాటికి ఏకంగా 14.14 బిలియన్ డాలర్లకు… అంటే సుమారు రూ.1.17 లక్షల కోట్లకు చేరుకుంటుందని అంచనా. 2031 నాటికి దేశంలో వృద్ధుల జనాభా 19.4 కోట్లకు చేరుకోనుండటమే ఇందుకు ప్రధాన కారణం. ప్రస్తుతం భారతదేశంలోని వ్యవస్థీకృత సీనియర్ లివింగ్ మార్కెట్లో దక్షిణాది నగరాలు ముందంజలో ఉన్నాయి. జేఎల్ఎల్, అసోసియేషన్ ఆఫ్ సీనియర్ లివింగ్ ఇండియా నివేదిక ప్రకారం.. దేశంలోని మొత్తం సీనియర్ హౌసింగ్ ప్రాజెక్టులలో 60 శాతం దక్షిణాదిలోనే ఉన్నాయి. ఆహ్లాదకరమైన వాతావరణం, అత్యుత్తమ వైద్య సదుపాయాలు ఉండటం వల్ల కోయంబత్తూర్, బెంగళూరు, పుణే వంటి నగరాలు పదవీ విరమణ చేసిన వారికి మొదటి ప్రాధాన్యతగా మారాయి.
ఉత్తరాది వైపు చూపు, కొత్త చిరునామా గురుగ్రామ్
దక్షిణాది నగరాల విజయవంతమైన మోడల్ను చూసి ఇప్పుడు ప్రముఖ డెవలపర్లు ఉత్తర భారతదేశం వైపు అడుగులు వేస్తున్నారు. దేశంలోనే అతిపెద్ద రియల్ ఎస్టేట్ సంస్థ అయిన డీఎల్ఎఫ్… గురుగ్రామ్లో ఒక భారీ సీనియర్ లివింగ్ ప్రాజెక్ట్ను ప్రారంభించబోతోంది. దీని ద్వారా దాదాపు రూ.2 వేల కోట్ల ఆదాయాన్ని సంస్థ ఆశిస్తోంది. ఇక్కడ నిర్మించే ఒక్కో విలాసవంతమైన ఇల్లు రూ.12 కోట్ల పైమాటాగానే ఉండటం విశేషం. కార్పొరేట్ ఆఫీసులకు కేరాఫ్గా ఉన్న గురుగ్రామ్ ఇప్పుడు రిటైర్మెంట్ హబ్గా మారుతోంది. ఇక్కడ నివసించే వారిలో దాదాపు 8 శాతం మంది 60 ఏళ్లు పైబడినవారే ఉన్నారు. మేదాంత, ఫోర్టిస్ వంటి అంతర్జాతీయ స్థాయి ఆసుపత్రులు దగ్గరగా ఉండటం, విమానాశ్రయానికి రవాణా సౌకర్యం సులభంగా ఉండటంతో సంపన్న వృద్ధులు, ఎన్నారైల తల్లిదండ్రులు ఇక్కడ నివసించడానికి ఇష్టపడుతున్నారు.
ఓవైపు తిరుపతి, మరోవైపు గుజరాత్ గిఫ్ట్ సిటీ జోరు
మెట్రో నగరాలకే పరిమితం కాకుండా ఇప్పుడు సీనియర్ లివింగ్ ప్రాజెక్టులు ఆధ్యాత్మిక నగరాలకూ విస్తరిస్తున్నాయి. తిరుపతిలో మానసమ్ సీనియర్ లివింగ్ సంస్థ ‘మయూర’ పేరుతో మొదటి వృద్ధుల నివాస సముదాయాన్ని ప్రకటిచింది. వృద్ధాప్యంలో ప్రశాంతతతో పాటు ఆధ్యాత్మిక జీవనాన్ని కోరుకునే వారికి ఇవి ఎంతగానో ఉపయోగపడుతున్నాయి. అహ్మదాబాద్, గాంధీనగర్, సూరత్ వంటి నగరాల్లో అత్యాధునిక మల్టీ-స్పెషాలిటీ ఆసుపత్రులు అందుబాటులోకి వచ్చాయి. దీనికి తోడు ‘గిఫ్ట్ సిటీ’ అభివృద్ధి చెందుతుండటంతో గుజరాత్ పెద్ద మార్కెట్గా అవతరిస్తోంది. మెట్రో నగరాలతో పోలిస్తే ఇక్కడ ఖర్చులు తక్కువగా ఉండటం, కాలుష్యం లేకపోవడంతో రిటైర్డ్ ఉద్యోగులు ఇటువైపు ఆకర్షితులవుతున్నారు.
ప్రకృతి ఒడిలో డెహ్రాడూన్, కసౌలి
హిమాలయాల అడుగుభాగంలో ఉండే డెహ్రాడూన్, కసౌలి వంటి హిల్ స్టేషన్లు కూడా సీనియర్ నివాసాలుగా రూపాంతరం చెందుతున్నాయి. ఢిల్లీ-డెహ్రాడూన్ ఎక్స్ప్రెస్వే వంటి కొత్త రోడ్డు మార్గాల వల్ల కనెక్టివిటీ పెరిగింది. స్వచ్ఛమైన గాలి, తక్కువ కాలుష్యం ఉన్న వాతావరణంలో ప్రశాంతమైన జీవితాన్ని గడపాలని అనుకునే వారికి ఇవి స్వర్గధామాలుగా మారుతున్నాయి. నేటి తరం వృద్ధులు కేవలం విశ్రాంతిని మాత్రమే కాకుండా, స్వాతంత్ర్యాన్ని, ఆత్మగౌరవాన్ని ఆశిస్తూ తమ రిటైర్మెంట్ జీవితాన్ని సరికొత్తగా ఆస్వాదిస్తున్నారు.
సీనియర్ లివింగ్ సెక్టార్లో మారుతున్న ధోరణులు
భారతదేశంలో వృద్ధుల జీవన విధానంలో వస్తున్న మార్పులు రిటైర్మెంట్ రంగాన్ని పూర్తిగా మార్చేస్తున్నాయి. నేటి తరం సీనియర్ సిటిజన్లు శారీరకంగా, ఆర్థికంగా ఎంతో బలంగా ఉంటూ, సమాజంలో చురుగ్గా గడపాలని కోరుకుంటున్నారు. గతంలో వృద్ధాశ్రమం అంటే ఏదో నిరాశ్రయుల కోసం అనే తప్పుడు భావన ఉండేది. కానీ నేడు అది ఆధునిక వసతులు, ఆత్మగౌరవంతో కూడిన ఒక విలాసవంతమైన జీవన శైలిగా రూపాంతరం చెందుతోంది. గురుగ్రామ్ వంటి మెట్రో నగరాల నుండి తిరుపతి వంటి ఆధ్యాత్మిక క్షేత్రాల వరకు, కసౌలి వంటి హిల్ స్టేషన్ల నుండి గిఫ్ట్ సిటీ వరకు ఈ ప్రాజెక్టులు విస్తరిస్తున్నాయి. వృద్ధాప్యాన్ని కేవలం విశ్రాంతి సమయంగా చూడకుండా, స్వేచ్ఛగా, సంతోషంగా జీవించే ఒక సరికొత్త అధ్యాయంగా మార్చడమే ఈ సరికొత్త ధోరణి ముఖ్య ఉద్దేశం.
#SeniorLiving #RetirementHomes #SeniorCitizens #RetirementLifestyle #RealEstateIndia #SeniorHousing #RetirementCommunities #IndiaRealEstate #RetirementPlanning #ElderCare #DLF #Gurugram #Bengaluru #Coimbatore #Pune #Tirupati #GiftCity #Dehradun #Kasauli #LuxuryRetirement #RetirementLife #HealthcareInfrastructure #NRIParents #ActiveAging #SeniorLivingIndia #PropertyNews #RealEstateNews #IndiaNews #LifestyleNews #RetirementTrend
