నాయకత్వంపై ఘాటు వ్యాఖ్యలు.
ప్రపంచం కొత్త వ్యవస్థ వైపు.
భారత్‌లో మాత్రం అరాచకం?
ప్రపంచమంతా కొత్త అంతర్జాతీయ వ్యవస్థ కోసం ఎదురుచూస్తుంటే.. భారత్‌లో కొందరు మాత్రం అస్తవ్యస్త పరిస్థితులను కోరుకుంటున్నారని ప్రధానమంత్రి నరేంద్ర మోదీ విమర్శించారు. గురువారం జరిగిన ఎన్డీటీవీ వరల్డ్‌ సమ్మిట్‌ 2026 ప్రారంభ కార్యక్రమంలో ఆయన కాంగ్రెస్‌ పార్టీతో పాటు లోక్‌సభలో ప్రతిపక్ష నేత రాహుల్‌ గాంధీని లక్ష్యంగా చేసుకుని తీవ్ర వ్యాఖ్యలు చేశారు. ప్రపంచంలో అనిశ్చితి నెలకొన్న సమయంలో భారత్‌ బలమైన దేశంగా తన ప్రతిష్ఠను చాటుకోవాల్సి ఉందని, అయితే కొందరు విదేశాలకు వెళ్లి దేశ ప్రతిష్ఠను దెబ్బతీస్తున్నారని ఆరోపించారు. విదేశీయులను భారత అంతర్గత వ్యవహారాల్లో జోక్యం చేసుకోవాలని కోరడం సరికాదని వ్యాఖ్యానించారు.
ఫెయిలైన ప్రొడక్ట్‌.. కాంగ్రెస్‌పై వ్యంగ్యాస్త్రాలు
కాంగ్రెస్‌ తన నాయకుడిని విజయవంతం చేసేందుకు ఎన్నిసార్లు ప్రయత్నించినా ఫలితం ఉండటం లేదని మోదీ ఎద్దేవా చేశారు. శ్రీహరికోటలో రాకెట్‌ ప్రయోగాల కంటే కాంగ్రెస్‌ తన నాయకుడిని రాజకీయంగా నిలబెట్టేందుకు చేసే ప్రయత్నాలే ఎక్కువగా ఉన్నాయని వ్యంగ్యంగా వ్యాఖ్యానించారు. ఒక కుటుంబ వైఫల్యాన్ని కప్పిపుచ్చేందుకు దేశ విజయాలు, అభివృద్ధిని పణంగా పెడుతున్నారని ఆరోపించారు. అధికారం కోల్పోయిన తర్వాత కాంగ్రెస్‌ వైఖరి పుల్లని ద్రాక్షను తలపిస్తోందని, చివరకు ఆ ద్రాక్ష తీగనే నాశనం చేయాలని చూస్తోందని విమర్శించారు.
ఒక్కరి కోసమే పార్టీనా? మోదీ సూటి ప్రశ్న
నెహ్రూ-గాంధీ కుటుంబం కాంగ్రెస్‌కు భారంగా మారిందని మోదీ వ్యాఖ్యానించారు. పార్టీలోని సీనియర్‌ నేతలు సైతం ఈ విషయాన్ని ప్రైవేటు సంభాషణల్లో అంగీకరిస్తున్నారని పేర్కొన్నారు. పార్లమెంట్‌లో యువ ప్రతిపక్ష ఎంపీలు ప్రభుత్వాన్ని విమర్శించేందుకు అవకాశం కోరుతున్నా, ఒక్క నాయకుడికే ప్రాధాన్యం ఇవ్వాలనే ఉద్దేశంతో సభా కార్యకలాపాలకు కాంగ్రెస్‌ అడ్డుపడుతోందని ఆరోపించారు. కాంగ్రెస్‌ ఇతరుల ఎదుగుదలను అడ్డుకునే ‘పరాన్నజీవి’గా మారిందని విమర్శించారు. పార్టీ ఆలోచనా శక్తిని ‘దిమాగీ నక్సల్స్‌’ ప్రభావితం చేస్తున్నారని, గతంలో గ్రామాల్లో విధ్వంసానికి పాల్పడినవారు ఇప్పుడు కాంగ్రెస్‌లో చేరి దేశాన్ని దెబ్బతీయాలని చూస్తున్నారని మోదీ తీవ్ర ఆరోపణలు చేశారు.
#NarendraModi #RahulGandhi #Congress #NDTVWorldSummit2026 #IndianPolitics #BJP #PoliticalNews #ModiSpeech #CongressCriticism #Parliament
