అటార్నీ జనరల్ అనుమతికి దరఖాస్తు.
ప్రధాన ఎన్నికల కమిషనర్ జ్ఞానేశ్ కుమార్పై క్రిమినల్ కోర్టు ధిక్కరణ చర్యలు ప్రారంభించేందుకు సుప్రీంకోర్టు న్యాయవాది బ్రజేష్ సింగ్ అటార్నీ జనరల్ ఆఫ్ ఇండియా అనుమతి కోరారు. ఎన్నికల కమిషన్లో ముగ్గురు సభ్యుల మధ్య ఏకాభిప్రాయం దెబ్బతిన్నట్లు వచ్చిన మీడియా కథనాల ఆధారంగా ఈ చర్యకు సిద్ధమయ్యారు. ది ఇండియన్ ఎక్స్ప్రెస్ కథనాన్ని ప్రస్తావిస్తూ, ఎన్నికల కమిషనర్లు సుఖ్బీర్ సింగ్ సంధు, వివేక్ జోషి గత పది నెలల్లో కనీసం 14 సార్లు లిఖితపూర్వక అభ్యంతరాలు వ్యక్తం చేశారని న్యాయవాది పేర్కొన్నారు. ఈ పరిణామాలు ఎన్నికల కమిషన్ వ్యవస్థలో తీవ్రమైన అంతర్గత విభేదాలను సూచిస్తున్నాయని ఆయన వాదించారు.
సర్ నిర్ణయాలపై తీవ్ర అభ్యంతరాలు
ఓటర్ల నమోదు సాఫ్ట్వేర్లో విస్తృత మార్పులు, ఫామ్-6లో మార్పులు, సర్ సమయంలో ఓటర్ల పేర్ల తొలగింపు, పునరుద్ధరణ వంటి కీలక చర్యలు తమకు తెలియకుండా, పూర్తి కమిషన్ అనుమతి లేకుండా జరిగాయని ఇద్దరు కమిషనర్లు అభ్యంతరం వ్యక్తం చేసినట్లు బ్రజేష్ సింగ్ తెలిపారు. ఈ చర్యలు అనధికారికం, చట్టవిరుద్ధం అంటూ వారు ప్రశ్నించినట్లు పేర్కొన్నారు. సీఈసీ చర్యలు సుప్రీంకోర్టు గత తీర్పులకు విరుద్ధంగా ఉన్నాయని ఆయన వాదించారు. ముఖ్యంగా టి.ఎన్. శేషన్ వర్సెస్ యూనియన్ ఆఫ్ ఇండియా, అనూప్ బరన్వాల్ వర్సెస్ యూనియన్ ఆఫ్ ఇండియా తీర్పులు ఎన్నికల కమిషన్ సంస్థాగత సమన్వయంతో పనిచేయాల్సిన అవసరాన్ని స్పష్టం చేశాయని గుర్తుచేశారు.
“సీఈసీ అందరికంటే పైవారు కాదు”
సీఈసీకి సంపూర్ణ అధికారం ఉండదని, ఆయన “సమానుల్లో మొదటి వ్యక్తి” మాత్రమేనని న్యాయవాది పేర్కొన్నారు. సహ కమిషనర్లను పక్కనపెట్టి, పూర్తి కమిషన్ పేరుతో నిర్ణయాలు జారీ చేయడం సుప్రీంకోర్టు నిర్దేశించిన చట్టాన్ని ఉద్దేశపూర్వకంగా ధిక్కరించినట్లవుతుందని ఆయన ఆరోపించారు. బహుళ సభ్యుల స్వతంత్ర రాజ్యాంగ సంస్థను ఒకే వ్యక్తి ఆధీనంలోకి తీసుకెళ్లడం సంస్థ ప్రతిష్ఠను దెబ్బతీస్తుందని, స్వేచ్ఛాయుత, నిష్పక్షపాత ఎన్నికల సూత్రానికి ముప్పు కలిగిస్తుందని అన్నారు. అయితే కోర్టు ధిక్కరణ పిటిషన్ను సుప్రీంకోర్టులో దాఖలు చేయడానికి ముందుగా భారత అటార్నీ జనరల్ అనుమతి తప్పనిసరి.
#GyaneshKumar #CEC #ContemptPetition #BrajeshSingh #AttorneyGeneral #CriminalContempt #ElectionCommission #SIR #SukhbirSinghSandhu #VivekJoshi #TNSeshan #AnoopBaranwal #VoterList #ElectionControversy #SupremeCourt
