బారికేడ్లు దాటేందుకు గోగోయ్ యత్నం.
సీఈసీ తొలగించాలంటూ ఆందోళన.
అసోం కాంగ్రెస్ అధ్యక్షుడు, ఎంపీ గౌరవ్ గోగోయ్తో పాటు పలువురు కాంగ్రెస్ నేతలను పోలీసులు అదుపులోకి తీసుకున్నారు. ప్రధాన ఎన్నికల కమిషనర్ జ్ఞానేశ్ కుమార్ను పదవి నుంచి తొలగించాలని డిమాండ్ చేస్తూ శుక్రవారం గువాహటిలో కాంగ్రెస్ నిరసన చేపట్టింది. రాష్ట్ర కాంగ్రెస్ కార్యాలయం రాజీవ్ భవన్ నుంచి పార్టీ నేతలు ర్యాలీగా బయలుదేరారు. అనంతరం చీఫ్ ఎలక్టోరల్ ఆఫీసర్ కార్యాలయం వద్దకు వెళ్లి సీఈసీ దిష్టిబొమ్మ దహనం చేయాలని కాంగ్రెస్ నిర్ణయించింది.
బారికేడ్లు దాటే ప్రయత్నం
రాజీవ్ భవన్ సమీపంలోనే పోలీసులు భారీ బారికేడ్లు ఏర్పాటు చేశారు. నిరసనకారులు ముందుకు వెళ్లకుండా అడ్డుకున్నారు. అయితే గౌరవ్ గోగోయ్తో పాటు పలువురు సీనియర్ నేతలు బారికేడ్లను దాటి ముందుకు వెళ్లేందుకు ప్రయత్నించడంతో పోలీసులు వారిని అదుపులోకి తీసుకున్నారు. పరిస్థితి ఉద్రిక్తంగా మారకుండా పోలీసులు నిరసనకారులను అక్కడి నుంచి తరలించారు. ఈ ఘటనతో గువాహటి ప్రాంతంలో కొంతసేపు రాజకీయ ఉద్రిక్తత నెలకొంది.
పలువురు నేతలు అదుపులోకి
గౌరవ్ గోగోయ్తో పాటు ఏఐసీసీ కార్యదర్శి మనోజ్ చౌహాన్, సేవాదళ్ అధ్యక్షుడు దీప్ బాయన్, ఏపీసీసీ ప్రధాన కార్యదర్శి ఉదిత్ భాను దాస్ సహా పలువురు నేతలను పోలీసులు అదుపులోకి తీసుకున్నారు. సీఈసీపై తమ నిరసనను తెలియజేసేందుకు కాంగ్రెస్ ఈ కార్యక్రమాన్ని చేపట్టినట్లు పార్టీ నేతలు తెలిపారు. ఎన్నికల ప్రక్రియపై తలెత్తుతున్న వివాదాల నేపథ్యంలో తమ ఆందోళనను మరింత ఉధృతం చేస్తామని కాంగ్రెస్ నేతలు చెబుతున్నారు.
ప్రజాస్వామ్యానికి బెదిరింపు
కాంగ్రెస్ అధికార ప్రతినిధి బెదబ్రత బోరా పోలీసుల చర్యను తీవ్రంగా తప్పుబట్టారు. కాంగ్రెస్ నేతలను బలవంతంగా అరెస్టు చేశారని ఆరోపించారు. ఈ చర్య ప్రజాస్వామ్యానికి మరో ముప్పుగా మారుతోందని ఆయన వ్యాఖ్యానించారు. సీఈసీ జ్ఞానేశ్ కుమార్పై ప్రతిపక్షాల నుంచి విమర్శలు కొనసాగుతున్న సమయంలో అసోంలో జరిగిన ఈ నిరసన ప్రాధాన్యం సంతరించుకుంది. ఎన్నికల సంఘం పనితీరు, ఓటర్ల జాబితాల సవరణపై దేశవ్యాప్తంగా చర్చ జరుగుతున్న వేళ సీఈసీ తొలగింపు డిమాండ్తో కాంగ్రెస్ చేపట్టిన ఆందోళన రాజకీయంగా చర్చనీయాంశమైంది.
#AssamCongress #GauravGogoi #GyaneshKumar #CEC #CECRemoval #CECResignation #CongressProtest #Guwahati #ElectionCommission #SIR #ElectoralRolls #ElectionControversy #AssamPolitics #CongressNews #IndiaPolitics
