అడవి మూలాలు ప్రపంచస్థాయి అవకాశాలు గిరిజన అభివృద్ధికి మంత్రుల దిశానిర్దేశం

గిరిజన సమాజం అడవితో ఉన్న అనుబంధాన్ని కాపాడుకుంటూనే అభివృద్ధిలో ముందంజ వేయాలని గిరిజన సంక్షేమ శాఖ మంత్రి అడ్లూరి లక్ష్మణ్ కుమార్ పిలుపునిచ్చారు. గిరిజన హక్కులు, ఆత్మగౌరవం, విద్య, ఉపాధి, ఆర్థికాభివృద్ధి, మహిళా సాధికారతకు ప్రభుత్వం ప్రాధాన్యం ఇస్తోందని తెలిపారు. 2026–27లో ఎస్టీ ప్రత్యేక అభివృద్ధి నిధి కింద రూ.18,745.16 కోట్లు కేటాయించినట్లు చెప్పారు. రహదారులు, తాగునీరు, విద్యుత్, సాగునీరు, వైద్యం, నైపుణ్యాభివృద్ధి రంగాల్లో ఈ నిధులను వినియోగిస్తున్నట్లు వెల్లడించారు. గిరిజన గురుకులాల్లో 83 వేల మందికి పైగా విద్యార్థులు చదువుతున్నారని, ఐఐటీ, ఎన్‌ఐటీ, నీట్‌లో గిరిజన విద్యార్థులు ప్రతిభ చూపుతున్నారని తెలిపారు. ఏఐ, ఆధునిక సాంకేతిక విద్య ద్వారా గిరిజన యువత ఉద్యోగాలు పొందే స్థాయి నుంచి ఉద్యోగాలు సృష్టించే స్థాయికి ఎదగాలని ఆకాంక్షించారు. అటవీ ఉత్పత్తులకు విలువ జోడించి మహిళలు, యువతకు ఆదాయ మార్గాలు పెంచాలని సూచించారు.

కుమురం భీమ్ స్ఫూర్తితో హక్కుల సాధన

కుమురం భీమ్ ఆశయాల సాధనకు అందరూ ఐక్యంగా కృషి చేయాలని మంత్రి సీతక్క పిలుపునిచ్చారు. గిరిజనుల భూమి, అటవీ, విద్య, ఉపాధి హక్కులను రాజ్యాంగం రక్షిస్తోందని చెప్పారు. సమ్మక్క-సారలమ్మ నుంచి కుమురం భీమ్ వరకు సాగిన పోరాట చరిత్ర గిరిజన సమాజానికి స్ఫూర్తి అని పేర్కొన్నారు. ఎవరినీ వ్యతిరేకించడం తమ లక్ష్యం కాదని, రాజ్యాంగం కల్పించిన హక్కులను న్యాయంగా పొందడమే తమ ఉద్దేశమని స్పష్టం చేశారు. గిరిజనుల భూముల సమస్యలు పరిష్కరించేందుకు ప్రభుత్వం కృషి చేస్తోందన్నారు. పేదలు, నిరక్షరాస్యులు తమ సమస్యలతో వచ్చినప్పుడు అధికారులు గౌరవంగా స్పందించాలని సూచించారు. భాష, వేషధారణ, సంస్కృతి, సంప్రదాయాలు గిరిజనుల అస్థిత్వానికి పునాది అని తెలిపారు. భవిష్యత్ తరాలకు ఈ వారసత్వాన్ని అందించడం ప్రతి ఒక్కరి బాధ్యతగా పేర్కొన్నారు. ఇద్దరు మంత్రుల వ్యాఖ్యల్లో గిరిజన అభివృద్ధితో పాటు హక్కుల పరిరక్షణ, విద్య, ఉపాధి, సంస్కృతి రక్షణకు సమాన ప్రాధాన్యం కనిపించింది.

#TribalDevelopment #TelanganaTribalWelfare #AdluriLaxmanKumar #Seethakka #TribalRights #TribalWelfare #KumaramBheem #TribalEducation #TribalEmployment #WomenEmpowerment #TribalGurukuls #SkillDevelopment #AIEducation #ForestProducts #TelanganaGovernment #TelanganaNews