నియామకాల్లో అక్రమాలపై వైసీపీ డిమాండ్ .
డీఎస్సీ నియామకాల్లో అక్రమాలు జరిగాయని తాము ఆధారాలతో బయటపెట్టామని వైఎస్సార్సీపీ ఎమ్మెల్సీ పర్వతరెడ్డి చంద్రశేఖర్రెడ్డి ఆరోపించారు. డీఎస్సీని రద్దు చేయాలని, ఇప్పటికే ఉద్యోగాలు పొందిన వారిని తొలగించాలని తాము కోరడం లేదని స్పష్టం చేశారు. కేవలం నియామక ప్రక్రియపై సీబీఐ దర్యాప్తు జరిపించి వాస్తవాలను వెలుగులోకి తేవాలని డిమాండ్ చేశారు. మంత్రి నారా లోకేష్ విద్యాశాఖ బాధ్యతల్లో ఉన్న సమయంలో దర్యాప్తు జరిగితే పారదర్శకతపై సందేహాలు తలెత్తే అవకాశం ఉందని, అందుకే ముందుగా ఆయన రాజీనామా చేయాలని కోరారు. సీబీఐ విచారణలో ఎలాంటి తప్పు లేదని తేలితే తిరిగి మంత్రి పదవిలో కొనసాగవచ్చని వ్యాఖ్యానించారు. ఈ అంశంపై రాబోయే శాసనమండలి సమావేశాల్లో ప్రభుత్వాన్ని నిలదీస్తామని తెలిపారు.
స్పోర్ట్స్ కోటా, టెట్, నార్మలైజేషన్పై ప్రశ్నలు
డీఎస్సీ ప్రక్రియలో ప్రశ్నపత్రాల లీకేజీ, అభ్యర్థులకు సమాచారం చేరడం, స్పోర్ట్స్ కోటా ధ్రువపత్రాల పరిశీలన, టెట్ నిబంధనలు, రిజర్వేషన్ల అమలు, నార్మలైజేషన్ వంటి అంశాల్లో అవకతవకలు జరిగాయని చంద్రశేఖర్రెడ్డి ఆరోపించారు. కొన్ని స్పోర్ట్స్ సర్టిఫికెట్లలో పేర్లు, సంతకాలు లేకపోయినా నియామకాలు జరిగాయని అన్నారు. టెట్ తప్పనిసరి అయిన సబ్జెక్టుల్లో కూడా నిబంధనలకు విరుద్ధంగా ఉద్యోగాలు ఇచ్చారన్నారు. నెల రోజుల పాటు నిర్వహించిన పరీక్షల్లో నార్మలైజేషన్ పేరుతో కొన్ని సెషన్లకు మార్కులు కలపడం వల్ల అనేక మంది అభ్యర్థులు నష్టపోయారని పేర్కొన్నారు. ఈ ఆరోపణలన్నింటిపై సమగ్ర దర్యాప్తు జరిగితే వాస్తవాలు బయటపడతాయని చెప్పారు. డీఎస్సీపై నిరసనలు చేస్తున్న అభ్యర్థులపై విమర్శలు చేయడం, ఉద్యోగాలు పొందిన వారితో రాజకీయ కార్యక్రమాలు నిర్వహించడం సమస్యకు పరిష్కారం కాదని అన్నారు. సీబీఐ దర్యాప్తు పూర్తయ్యే వరకు వైఎస్సార్సీపీ పోరాటం కొనసాగుతుందని చంద్రశేఖర్రెడ్డి స్పష్టం చేశారు.
#APDSC #DSCRecruitment #DSCScam #CBIProbe #YSRCP #ParvathaReddyChandrasekharReddy #NaraLokesh #TeacherRecruitment #AndhraPradeshPolitics #DSCIrregularities #DSCQuestionPaperLeak #SportsQuota #TETRules #Normalisation #ReservationIrregularities #TeacherJobs #APEducationDepartment #AndhraPradeshNews #YSRCPProtest #DSCCandidates
