మహిళలే దేశానికి అతిపెద్ద బలం

నిరూపించుకోవాల్సిన అవసరం లేదు.
పుణె ‘ఛాత్రోన్ కీ గూంజ్’‌లో రాహుల్ గాంధీ.

పుణెలో జరిగిన ‘ఛాత్రోన్ కీ గూంజ్’ కార్యక్రమంలో కాంగ్రెస్ నేత రాహుల్ గాంధీ మహిళల స్వాతంత్ర్యం, గుర్తింపుపై కీలక వ్యాఖ్యలు చేశారు. మహిళలు దేశానికి అతిపెద్ద బలం, సంపద అని అన్నారు. దేశంలోని 70 కోట్ల మంది మహిళలు తమకంటూ ప్రత్యేక ప్రయాణాలు, ఆలోచనలు, కలలు కలిగి ఉన్నారని పేర్కొన్నారు. మహిళలు పురుషుల కంటే ఎక్కువ సున్నితత్వం, దయ, దూరదృష్టి కలిగి ఉంటారని తన అభిప్రాయాన్ని వెల్లడించారు. మహిళలు తమ ప్రతిభను ఎవరికీ నిరూపించుకోవాల్సిన అవసరం లేదని రాహుల్ స్పష్టం చేశారు. కుటుంబ బంధాలు మహిళల జీవితంలో భాగమే అయినా, అవే ఆమె మొత్తం గుర్తింపుగా మారకూడదని అన్నారు.

కూతురు.. భార్య.. తల్లి మాత్రమే కాదు

మహిళలను తరచుగా కూతురు, భార్య, తల్లి అనే మూడు పాత్రలతోనే గుర్తిస్తున్నారని రాహుల్ గాంధీ విమర్శించారు. ఈ మూడు బంధాల్లో తప్పేమీ లేదని చెబుతూనే, మహిళకు అవే ఏకైక గుర్తింపులు కాదని స్పష్టం చేశారు. ప్రతి మహిళ తనకంటూ వృత్తి, ఆసక్తులు, లక్ష్యాలు కలిగి ఉండవచ్చని అన్నారు. ఆమె ప్రొఫెషనల్ కావచ్చు, క్రీడాకారిణి కావచ్చు, వ్యాపారవేత్త కావచ్చు, నాయకురాలు కావచ్చు, తనకు నచ్చిన రంగంలో ముందుకు వెళ్లవచ్చని పేర్కొన్నారు. మహిళ గుర్తింపు ఒక పురుషుడితో ఉన్న సంబంధం ఆధారంగా నిర్ణయించకూడదన్నారు రాహుల్. తండ్రి, సోదరుడు, భర్త, కొడుకుతో బంధాలు ఉండొచ్చు కానీ ఆ బంధాలు ఆమె స్వేచ్ఛను నిర్ణయించకూడదని అన్నారు.

స్వేచ్ఛే మహిళల అసలైన శక్తి

మహిళల స్వాతంత్ర్యంపై మాట్లాడిన రాహుల్ గాంధీ మనుస్మృతిని కూడా ప్రస్తావించారు. జీవితంలోని వివిధ దశల్లో మహిళ తండ్రి, భర్త, కుమారుడి ఆధీనంలో ఉండాలనే భావనను ఆయన విమర్శించారు. “మహిళలు స్వతంత్రంగా నిలబడాలి.. తమపై తాము నమ్మకం పెట్టుకోవాలి” అని పిలుపునిచ్చారు. మహిళల ఆర్థిక, సామాజిక స్వాతంత్ర్యానికి కాంగ్రెస్ పలు ప్రతిపాదనలు ప్రకటించిన విషయాన్ని కూడా ప్రస్తావించారు. 18 నుంచి 59 ఏళ్ల మహిళలకు నెలకు రూ.2,000 ఆర్థిక సాయం, మహిళలపై హింసకు కఠిన చట్టాలు, ఫాస్ట్‌ట్రాక్ కోర్టులు, 24 గంటల హెల్ప్‌లైన్, ఉచిత ప్రజా రవాణా వంటి హామీలు ఉన్నాయి. మహిళా వ్యాపారాల కోసం రూ.5,000 కోట్ల ప్రత్యేక నిధి, రూ.5 లక్షల వరకు వడ్డీలేని రుణాలు అందిస్తామని కాంగ్రెస్ ప్రతిపాదించింది. పుదుచ్చేరిలో కాంగ్రెస్ అధికారంలోకి వస్తే మహిళలకు ఉచిత బస్సు ప్రయాణం కల్పిస్తామని కూడా రాహుల్ హామీ ఇచ్చారు.

#RahulGandhi #ChhatronKiGoonj #Pune #WomenEmpowerment #WomenFreedom #WomenIndependence #WomenEquality #WomenPower #WomenRights #RahulGandhiSpeech #Congress #CongressParty #WomenSafety #WomenEntrepreneurs #IndianPolitics #PoliticalNews