అమెరికా అధ్యక్షుడు డొనాల్డ్ ట్రంప్ మరోసారి ఇరాన్పై సంచలన వ్యాఖ్యలు చేశారు. ఇరాన్ చంపాలనుకుంటున్న హిట్ లిస్టులో తాను అగ్రస్థానంలో ఉన్నానని, ఇప్పటివరకు అదృష్టం కలిసి వచ్చిందని, అయితే అది ఎప్పటికీ కొనసాగకపోవచ్చని అన్నారు. టర్కీలో జరిగిన నాటో సదస్సు సందర్భంగా మీడియాతో మాట్లాడిన ట్రంప్, ఇరాన్ తనను హత్య చేయాలని చూస్తోందని ఆరోపించారు. “ప్రతి జాబితాలో నా పేరే ఉంది. ఇప్పటివరకు నేను అదృష్టవంతుడిని. కానీ అది ఎంతకాలం ఉంటుందో చెప్పలేను” అని వ్యాఖ్యానించారు. ఇటీవల అమెరికా ఇరాన్లోని పలు లక్ష్యాలపై దాడులు జరిపిన తర్వాత ఇరు దేశాల మధ్య ఉద్రిక్తతలు మరింత పెరిగాయి. ఇరాన్తో ఉన్న అవగాహన ప్రక్రియ ముగిసిపోయిందని ట్రంప్ ప్రకటిస్తూ, అక్కడి చర్చల ప్రతినిధులపై తీవ్ర విమర్శలు చేశారు. చర్చలు కొనసాగినా వాటి వల్ల ప్రయోజనం ఉండదనే అభిప్రాయం వ్యక్తం చేశారు. మరోవైపు, ఇరాన్ మాజీ అత్యున్నత నాయకుడి అంత్యక్రియల సందర్భంగా ట్రంప్, ఇజ్రాయెల్ ప్రధాని బెంజమిన్ నెతన్యాహుపై వ్యతిరేక నినాదాలు వినిపించాయి. ట్రంప్ను హత్య చేయాలని పిలుపునిచ్చే పోస్టర్లు, నినాదాలు కూడా అక్కడ కనిపించాయని అంతర్జాతీయ మీడియా వెల్లడించింది. ఈ పరిణామాలు అమెరికా–ఇరాన్ సంబంధాల్లో ఉద్రిక్తతలను మరింత పెంచే అవకాశముందని విశ్లేషకులు భావిస్తున్నారు.
