డిఫెన్స్‌ తయారీలో అగ్రగామిగా మారుస్తాం.
పెట్టుబడులు రెట్టింపు చేయాలన్న సీఎం .
రక్షణ, అంతరిక్ష, ఏరోస్పేస్‌ రంగాల్లో తెలంగాణను ప్రపంచస్థాయి పారిశ్రామిక కేంద్రంగా తీర్చిదిద్దడమే లక్ష్యమని ముఖ్యమంత్రి రేవంత్‌ రెడ్డి స్పష్టం చేశారు. రక్షా ఎక్స్‌పో కర్టెన్‌ రైజర్‌ కార్యక్రమంలో పాల్గొన్న ఆయన.. రక్షణ రంగానికి చెందిన పరిశ్రమలు, పరిశోధనా సంస్థలు, స్టార్టప్‌లు ఒకే వేదికపైకి రావడం ద్వారా కొత్త అవకాశాలు ఏర్పడతాయని పేర్కొన్నారు. డిసెంబర్‌ 7, 8, 9 తేదీల్లో హైదరాబాద్‌ భారత్‌ ఫ్యూచర్‌ సిటీలో జరగనున్న ఇన్వెస్ట్‌ తెలంగాణ గ్లోబల్ సమ్మిట్‌కు పారిశ్రామిక ప్రముఖులను ఆహ్వానించారు. గతేడాది నిర్వహించిన సదస్సు విజయవంతమైందని, ఈసారి మరింత భారీ స్థాయిలో నిర్వహించనున్నట్లు తెలిపారు. డీఆర్‌డీఓ, హెచ్‌ఏఎల్‌, బీడీఎల్‌, మిధాని, టాటా, ఎయిర్‌బస్‌, సాఫ్రాన్‌, స్కైరూట్‌, లాక్‌హీడ్‌ మార్టిన్‌, భారత్‌ ఫోర్జ్‌ వంటి సంస్థల భాగస్వామ్యంతో రక్షణ పరిశ్రమకు కొత్త ఊపునివ్వాలని ఆకాంక్షించారు.
రక్షణ పరిశ్రమకు హైదరాబాద్‌ అనుకూల కేంద్రం
హైదరాబాద్‌ సురక్షిత నగరమని, అనేక పరిశోధనా సంస్థలు, సైనిక వ్యూహాత్మక కేంద్రాలకు నిలయమని ముఖ్యమంత్రి పేర్కొన్నారు. సముద్రతీరం లేని తెలంగాణ కూడా భారత నౌకాదళానికి కీలక సేవలు అందిస్తోందని వివరించారు. వికారాబాద్‌ జిల్లా దామగుండం రిజర్వ్‌ ఫారెస్ట్‌లో నిర్మిస్తున్న అత్యల్ప పౌనఃపున్య రాడార్‌ కేంద్రాన్ని ప్రస్తావించారు. ఐఐటీ, ఐఐఐటీ, ఎన్‌ఐటీ, ఐఎస్‌బీ, బిట్స్‌ వంటి విద్యాసంస్థలతో పాటు యంగ్‌ ఇండియా స్కిల్స్‌ యూనివర్సిటీ, అడ్వాన్స్‌డ్‌ ట్రైనింగ్‌ సెంటర్ల ద్వారా నైపుణ్య మానవ వనరులను సిద్ధం చేస్తున్నామని తెలిపారు. రక్షణ సాంకేతికతను దిగుమతి చేసుకునే స్థాయి నుంచి ఎగుమతులు చేసే దేశంగా భారత్‌ ఎదగాలి అని ఆకాంక్షించారు.
పెట్టుబడులు రెట్టింపు చేయండి.. పాలసీ 2.0 సిద్ధం
తెలంగాణను 2034 నాటికి ఒక ట్రిలియన్‌ డాలర్ల ఆర్థిక వ్యవస్థగా, 2047 నాటికి మూడు ట్రిలియన్‌ డాలర్ల ఆర్థిక శక్తిగా తీర్చిదిద్దడమే లక్ష్యమని రేవంత్‌ రెడ్డి వెల్లడించారు. దేశ జీడీపీలో తెలంగాణ వాటాను ప్రస్తుత ఐదు శాతం నుంచి 2047 నాటికి పది శాతానికి పెంచాలని లక్ష్యంగా పెట్టుకున్నట్లు తెలిపారు. రక్షణ తయారీ, ఏరోస్పేస్‌, సైబర్‌ సెక్యూరిటీ, కృత్రిమ మేధస్సు, డ్రోన్‌ టెక్నాలజీ రంగాలు ఈ లక్ష్య సాధనలో కీలకమని పేర్కొన్నారు. త్వరలో ఏరోస్పేస్‌ అండ్‌ డిఫెన్స్‌ పాలసీ 2.0 విడుదల చేస్తామని ప్రకటించారు. రాష్ట్రంలో పెట్టుబడులు, అభివృద్ధి విషయంలో విధానపరమైన అడ్డంకులు లేవని స్పష్టం చేస్తూ, పారిశ్రామికవేత్తలు పెట్టుబడి ప్రణాళికలను రెట్టింపు చేయాలని కోరారు. అవసరమైన సహకారం అందించేందుకు ప్రభుత్వం సిద్ధంగా ఉందని హామీ ఇచ్చారు. భారత రక్షణ పరిశ్రమకు తెలంగాణ అతిపెద్ద పారిశ్రామిక కేంద్రంగా ఎదిగేందుకు పరిశ్రమలు, స్టార్టప్‌లు, అంతర్జాతీయ సంస్థలు కలిసి పనిచేయాలని పిలుపునిచ్చారు.
#TelanganaDefenceHub #RevanthReddy #TelanganaInvestments #RakshaExpo #InvestTelangana #DefenceManufacturing #AerospaceIndustry #Hyderabad #BharatFutureCity #DRDO #HAL #BDL #MIDHANI #DefenceStartups #AerospaceAndDefencePolicy
