ట్రంప్‌కు పుతిన్ చెక్ ఇరాన్‌కు రష్యా క్షిపణులు

మిసైళ్ల తయారీకి రహస్య సాయం!
C430Lతో మారుతున్న ఇరాన్ క్షిపణి శక్తి

రష్యా రహస్యంగా ఇరాన్‌కు అత్యాధునిక క్షిపణి సాంకేతికతను అందిస్తున్నట్లు ఫైనాన్షియల్ టైమ్స్ నివేదిక సంచలన విషయాలను వెల్లడించింది. అమెరికా యుద్ధనౌకలు, విమాన వాహక నౌకలను లక్ష్యంగా చేసుకోగల సూపర్‌సోనిక్ క్రూయిజ్ మిసైళ్ల అభివృద్ధికి ఈ సహకారం జరుగుతున్నట్లు సమాచారం. C430L కోడ్ పేరుతో ఈ రహస్య కార్యక్రమం 2023లో రూపుదిద్దుకుంది. ఇందులో కీలకంగా రామ్‌జెట్ ప్రొపల్షన్ సాంకేతికతను ఉపయోగించనున్నట్లు తెలుస్తోంది. ఈ టెక్నాలజీతో క్షిపణులు ధ్వని వేగానికి ఎన్నో రెట్లు వేగంగా దూసుకెళ్లే అవకాశం ఉంటుంది. అత్యంత వేగంతో తక్కువ ఎత్తులో ప్రయాణించే క్షిపణిని గుర్తించడం, ట్రాక్ చేయడం, అడ్డుకోవడం రక్షణ వ్యవస్థలకు మరింత కష్టంగా మారుతుంది.

రష్యా అగ్రస్థాయి అనుమతి అవసరమైన డీల్

ఈ స్థాయి సున్నితమైన సైనిక సాంకేతిక బదిలీకి రష్యా ప్రభుత్వ అత్యున్నత స్థాయి రాజకీయ అనుమతి అవసరమై ఉండొచ్చని నిపుణులు చెబుతున్నారు. ఇరాన్ రామ్‌జెట్ టెక్నాలజీ కోసం చాలాకాలంగా ప్రయత్నిస్తోంది. 2023 ఆగస్టులో రామ్‌జెట్ ప్రోటోటైప్‌లను పరీక్షించినట్లు ఇరాన్ మీడియా గతంలో వెల్లడించింది. నవంబర్ 2023లో C430L ఒప్పందం అధికారికంగా కుదిరే ముందే దాని కోసం ఏర్పాట్లు ప్రారంభమైనట్లు లీకైన పత్రాలను పరిశీలించిన ఫైనాన్షియల్ టైమ్స్ పేర్కొంది. ఇరాన్‌కు ఈ సాంకేతికత లభిస్తే అమెరికా నౌకాదళానికి కొత్త వ్యూహాత్మక సవాలు ఎదురవుతుందని నిపుణులు అంచనా వేస్తున్నారు. ముఖ్యంగా వేగం, తక్కువ ఎత్తులో ప్రయాణం కలిసివస్తే అమెరికా రక్షణ వ్యవస్థలకు స్పందించే సమయం తగ్గిపోవచ్చు.

మాస్కో–టెహ్రాన్ బంధంలో కొత్త కోణం

ఇరాన్‌కు రష్యా సహకారం క్షిపణి రంగానికే పరిమితం కాదన్న ఆరోపణలు ఉన్నాయి. ఇరాన్ రష్యా డ్రోన్ కార్యక్రమానికి మద్దతు ఇచ్చిన నేపథ్యంలో, మాస్కో కూడా ఇరాన్ క్షిపణి అభివృద్ధికి సాయం చేస్తున్నట్లు సమాచారం. ఇటీవల ఇరాన్ అధ్యక్షుడు మసూద్ పెజెష్కియాన్‌తో మాట్లాడిన రష్యా అధ్యక్షుడు వ్లాదిమిర్ పుతిన్ కష్టకాలంలో అవసరమైన సహాయం అందిస్తామని ప్రకటించారు. ఇదే సమయంలో చైనా నుంచి ఇరాన్‌కు అధిక రిజల్యూషన్ ఉపగ్రహ సాంకేతికత చేరినట్లు కూడా ఆరోపణలు వచ్చాయి. ఆ ఉపగ్రహాన్ని మధ్యప్రాచ్యంలో అమెరికా సైనిక స్థావరాలపై నిఘాకు ఉపయోగించినట్లు సమాచారం. ఈ నేపథ్యంలో రష్యా క్షిపణి సాంకేతికత, చైనా ఉపగ్రహ నిఘా సామర్థ్యం ఇరాన్‌కు కలిస్తే అమెరికా బలగాలపై ముప్పు మరింత పెరిగే అవకాశం ఉందన్న ఆందోళనలు వ్యక్తమవుతున్నాయి.

#Russia #Iran #Putin #Trump #C430L #IranMissiles #RussianMissileTechnology #MissileTechnology #Ramjet #CruiseMissiles #IranMilitary #USNavy #MiddleEast #RussiaIran #Geopolitics #MilitaryTechnology #MissileProgram #C430LProgram