దేవాంగ సంఘం బలోపేతానికి సమష్టి సంకల్పం!
కూటమికి మద్దతు.. వెంకటరమణకు మళ్లీ పగ్గాలు
మూడోసారి అధ్యక్షుడిగా ఏకగ్రీవ ఎన్నిక
అమరావతి దేవాంగ సంక్షేమ సంఘం అభివృద్ధి, సామాజిక వర్గ సంక్షేమమే లక్ష్యంగా సమష్టిగా పనిచేస్తామని నూతన అధ్యక్షుడు బల్ల వెంకటరమణ స్పష్టం చేశారు. సంఘం అధ్యక్షుడిగా తనను మూడోసారి ఏకగ్రీవంగా ఎన్నుకున్నందుకు కార్యవర్గ సభ్యులకు కృతజ్ఞతలు తెలిపారు. ఆదివారం రాత్రి మంగళగిరి నగర పరిధిలోని ఇప్పటం రోడ్డులో పోట్లాబత్తుని లక్ష్మణరావు మామిడి తోటలో జరిగిన సమావేశంలో నూతన కార్యవర్గాన్ని ఏకగ్రీవంగా ఎన్నుకున్నారు. అధ్యక్షుడిగా బల్ల వెంకటరమణ, ప్రధాన కార్యదర్శిగా అల్లక తాతారావు, కోశాధికారిగా అల్లక నమశ్శివాయ ఎన్నికయ్యారు. గత కార్యవర్గాన్నే కొనసాగించాలని సభ్యులు నిర్ణయించడం విశేషం.
సంక్షేమ కార్యక్రమాల విస్తరణపై దృష్టి
సంఘం ఆధ్వర్యంలో గతంలో చేపట్టిన సంక్షేమ కార్యక్రమాలను భవిష్యత్తులోనూ కొనసాగిస్తామని వెంకటరమణ తెలిపారు. సభ్యుల సహకారంతో మరిన్ని అభివృద్ధి కార్యక్రమాలు చేపడతామని పేర్కొన్నారు. సమావేశంలో సంఘం నిర్వహిస్తున్న కార్యక్రమాలు, ఆదాయ వ్యయాల వివరాలను కార్యవర్గ సభ్యులకు వెల్లడించారు. రాబోయే రోజుల్లో చేపట్టాల్సిన కార్యక్రమాలపై చర్చించారు. దేవాంగ సామాజిక వర్గ అభ్యున్నతికి సభ్యులందరూ ఐక్యంగా ముందుకు రావాలని పిలుపునిచ్చారు. సంఘం బలోపేతానికి ప్రతి ఒక్కరి సహకారం అవసరమని ఆయన పేర్కొన్నారు.
మంగళగిరి–తాడేపల్లి ఎన్నికల్లో కూటమికి మద్దతు
రాబోయే మంగళగిరి–తాడేపల్లి నగరపాలక సంస్థ ఎన్నికల్లో కూటమికి సంపూర్ణ మద్దతు ప్రకటించాలని సమావేశం నిర్ణయించింది. తమ తమ వార్డుల్లో అధికార కూటమి అభ్యర్థులకు సహకరిస్తూ పనిచేయాలని సభ్యులు తీర్మానించినట్లు వెంకటరమణ వెల్లడించారు. ఈ సమావేశంలో గౌరవ సలహాదారులు పుచ్చల వెంకటేశ్వరరావు, ఆచార్య రత్న, డాక్టర్ కొసనం కోట నాగ శ్యామలరావు, మెట్ల జగపతి, అధికార ప్రతినిధి బీరక మల్లేశ్వరరావు, వర్కింగ్ ప్రెసిడెంట్లు యుద్ధం అప్పారావు, కనకం రాజారావు, సహాయ కార్యదర్శులు, ఇతర కార్యవర్గ సభ్యులు పాల్గొన్నారు. సమావేశాన్ని విజయవంతం చేసిన వారందరికీ అమరావతి దేవాంగ సంక్షేమ సంఘం మంగళగిరి, గుంటూరు జిల్లా నిర్వాహకులు హృదయపూర్వక కృతజ్ఞతలు తెలిపారు.
