కేంద్ర సహకారం, నిధులపై చర్చలు.
ఆంధ్రప్రదేశ్ ముఖ్యమంత్రి చంద్రబాబు నాయుడు కేంద్ర ఆర్థిక మంత్రి నిర్మలా సీతారామన్‌తో సమావేశమయ్యారు. ఢిల్లీలో జరిగిన ఈ భేటీలో రాష్ట్రానికి సంబంధించిన పలు అభివృద్ధి అంశాలు చర్చకు వచ్చాయి.
రాయలసీమ ప్రాంతంలో ప్రతిపాదించిన గ్లోబల్ హార్టికల్చర్ హబ్‌ (జీహెచ్‌హెచ్‌) ప్రాజెక్టు పురోగతిపై ఇరువురు చర్చించారు. ఉద్యాన పంటలకు ఆధునిక సాంకేతికతను అనుసంధానం చేయడం, రైతులకు మెరుగైన మార్కెటింగ్ అవకాశాలు కల్పించడం, వ్యవసాయ ఉత్పత్తులకు విలువను పెంచే విధంగా మౌలిక వసతులు అభివృద్ధి చేయడం వంటి అంశాలపై సమావేశంలో ప్రస్తావన వచ్చినట్లు తెలుస్తోంది. రాయలసీమలో ఉద్యాన రంగాన్ని మరింత బలోపేతం చేయడంలో ఈ ప్రాజెక్టు కీలకంగా ఉండేలా కార్యాచరణ రూపొందిస్తున్నట్లు సమాచారం.
కేంద్ర నిధులు, రాష్ట్ర వాటాపై సమాలోచన
జీహెచ్‌హెచ్‌ ప్రాజెక్టు అమలుకు అవసరమైన కేంద్ర సహకారంతో పాటు నిధుల సమీకరణకు సంబంధించిన అంశాలపైనా చంద్రబాబు నిర్మలా సీతారామన్‌తో చర్చించినట్లు తెలుస్తోంది. కేంద్రం, రాష్ట్రం మధ్య వాటాలు, ఎక్స్‌టర్నల్లీ ఎయిడెడ్ ప్రాజెక్టుల అంశాలు కూడా సమావేశంలో చర్చకు వచ్చినట్లు సమాచారం. రాష్ట్ర అభివృద్ధికి కేంద్రం నుంచి అవసరమైన సహకారం అందించాలని ముఖ్యమంత్రి కోరినట్లు తెలుస్తోంది. జీహెచ్‌హెచ్‌ ప్రాజెక్టుపై కేంద్ర మంత్రి చూపుతున్న శ్రద్ధకు చంద్రబాబు కృతజ్ఞతలు తెలిపారు. సమావేశంలో రాష్ట్ర ఆర్థిక మంత్రి పయ్యావుల కేశవ్, ఎంపీ శ్రీకృష్ణదేవరాయలు కూడా పాల్గొన్నారు.
#ChandrababuNaidu #NirmalaSitharaman #GlobalHorticultureHub #Rayalaseema #GHH #AndhraPradesh #APDevelopment #CentralFunding #APProjects #HorticultureHub #RayalaseemaDevelopment #PayyavulaKeshav #SriKrishnaDevarayalu #APPolitics #AgricultureDevelopment
