సుప్రీం కోర్టు తీప్పు నేపథ్యేంలో సమావేశం.
ఆంధ్రప్రదేశ్‌లో బీసీ రిజర్వేషన్ల వ్యవహారంపై రాష్ట్ర ప్రభుత్వం కీలక నిర్ణయానికి సిద్ధమవుతోంది. ముఖ్యమంత్రి చంద్రబాబు నాయుడు అధ్యక్షతన శనివారం ఉదయం 11 గంటలకు సచివాలయంలో ప్రత్యేక మంత్రివర్గ సమావేశం జరగనుంది. స్థానిక సంస్థల ఎన్నికల్లో బీసీలకు 34 శాతం రిజర్వేషన్లు కల్పించే అంశంపై సుప్రీంకోర్టు రాష్ట్ర ప్రభుత్వ పిటిషన్‌ను కొట్టివేసిన నేపథ్యంలో ఈ భేటీకి ప్రాధాన్యం ఏర్పడింది. గతంలో రాష్ట్ర హైకోర్టు ఇచ్చిన తీర్పును సుప్రీంకోర్టు సమర్థించడంతో, తదుపరి కార్యాచరణపై ప్రభుత్వం దృష్టి సారించింది. ఈ సమావేశానికి మంత్రులందరూ హాజరు కావాలని సచివాలయం ఆదేశించినట్లు సమాచారం.
కమిషన్ నివేదిక ఆధారంగా కార్యాచరణ
బీసీ రిజర్వేషన్లపై రాజీవ్ రంజన్ మిశ్రా కమిషన్ నివేదికను మంత్రివర్గం పరిశీలించే అవకాశం ఉంది. జనాభా గణాంకాలు, కమిషన్ సిఫార్సుల ఆధారంగా రిజర్వేషన్లపై తదుపరి నిర్ణయం తీసుకోవడంపై చర్చ జరగనుంది. సుప్రీంకోర్టు తీర్పునకు అనుగుణంగా కొత్త ప్రభుత్వ ఉత్తర్వులు జారీ చేయడం, గతంలో ఇచ్చిన ఉత్తర్వులను ఉపసంహరించుకోవడం వంటి అంశాలపైనా ప్రభుత్వం దృష్టి పెట్టినట్లు తెలుస్తోంది. మొత్తం రిజర్వేషన్లు 50 శాతం పరిమితిని మించకుండా బీసీలకు న్యాయం చేసే మార్గాలను మంత్రులు చర్చించనున్నారు. బీసీలకు ఇచ్చిన హామీని నిలబెట్టుకుంటూనే, న్యాయపరమైన అడ్డంకులు లేకుండా స్థానిక ఎన్నికల్లో రిజర్వేషన్లు అమలు చేసేందుకు ప్రభుత్వం ఎలాంటి నిర్ణయం తీసుకుంటుందన్నది ఆసక్తికరంగా మారింది.
#APCabinet #BCReservations #AndhraPradesh #ChandrababuNaidu #BCQuota #SupremeCourt #34PercentReservation #LocalBodyElections #RajivRanjanMishra #ReservationPolicy #APPolitics #BreakingNews
