23 క్లస్టర్లతో భారీ అవకాశాలు.
సీఐఐ పార్ట్నర్షిప్ సమ్మిట్ రోడ్షోలో లోకేశ్.
అహ్మదాబాద్లో జరిగిన సీఐఐ పార్ట్నర్షిప్ సమ్మిట్ రోడ్షోలో గుజరాత్ పారిశ్రామికవేత్తలను ఆంధ్రప్రదేశ్లో భాగస్వాములు కావాలని మంత్రి నారా లోకేశ్ ఆహ్వానించారు. 2025-26 ఆర్థిక సంవత్సరం తొలి తొమ్మిది నెలల్లో దేశవ్యాప్తంగా ప్రతిపాదిత పెట్టుబడుల్లో ఏపీ వాటా 25.3 శాతంగా ఉందని ఆయన తెలిపారు. పెట్టుబడుల ప్రకటనలతోనే లక్ష్యం పూర్తికాదని, ప్రాజెక్టులు వేగంగా కార్యరూపం దాల్చేలా ప్రభుత్వం ప్రత్యేక దృష్టి పెడుతోందన్నారు. స్పీడ్, స్టెబిలిటీ, సర్వీస్ అనే మూడు ‘ఎస్’లతో పారిశ్రామిక విధానాన్ని ముందుకు తీసుకెళ్తున్నామని లోకేశ్ వివరించారు. పెట్టుబడిదారులకు వేగవంతమైన అనుమతులు, స్థిరమైన విధానాలు, మెరుగైన సేవలు అందించడమే ప్రభుత్వ లక్ష్యమని చెప్పారు.
23 రంగాల్లో ప్రత్యేక క్లస్టర్లు
ఎలక్ట్రానిక్స్, గ్రీన్ ఎనర్జీ, ఫార్మాస్యూటికల్స్, స్టీల్, డ్రోన్లు, ఆక్వాకల్చర్, అధునాతన తయారీ వంటి రంగాల్లో రాష్ట్రవ్యాప్తంగా 23 ప్రత్యేక పారిశ్రామిక క్లస్టర్లను అభివృద్ధి చేస్తున్నామని లోకేశ్ తెలిపారు. పారిశ్రామిక అభివృద్ధిలో గుజరాత్ సాధించిన ప్రగతిని ప్రస్తావిస్తూ, ఆ రాష్ట్రం వ్యాపార స్ఫూర్తి, మౌలిక వసతులు, సమర్థవంతమైన అమలుకు దేశానికి ఉదాహరణగా నిలిచిందన్నారు. ఏపీకి విస్తృత భూభాగం, వేగవంతమైన ప్రాజెక్టుల అమలు సామర్థ్యం, తూర్పు తీరంలో వ్యూహాత్మక భౌగోళిక ప్రయోజనం ఉన్నాయని వివరించారు. గుజరాత్ పారిశ్రామిక శక్తి, ఏపీ అవకాశాలు కలిస్తే కొత్త పారిశ్రామిక అధ్యాయం సృష్టించవచ్చని లోకేశ్ పిలుపునిచ్చారు. “రండి.. ఏపీతో కలిసి నిర్మించండి, అభివృద్ధి చెందండి” అంటూ పారిశ్రామికవేత్తలకు ఆహ్వానం పలికారు.
#AndhraPradesh #NaraLokesh #CII #CIIPartnershipSummit #APInvestments #InvestmentOpportunities #IndustrialClusters #23Clusters #Ahmedabad #GujaratInvestors #APIndustrialPolicy #GreenEnergy #Pharmaceuticals #AdvancedManufacturing #APDevelopment
