సింగూరు జలాలపై హరీశ్‌రావు ఆరోపణలు
కాంగ్రెస్ ప్రభుత్వానికి రైతులపై ప్రేమ లేదు.. లిక్కర్‌పై మక్కువ ఎక్కువ అంటూ బీఆర్ఎస్ సీనియర్ నేత, మాజీ మంత్రి హరీశ్‌రావు తీవ్రస్థాయిలో విమర్శించారు. సింగూరు ప్రాజెక్టులో ఉన్న రెండు టీఎంసీల నీటిని తాగునీటి అవసరాలకు వినియోగించకుండా, మద్యం ఫ్యాక్టరీలకు సరఫరా చేస్తున్నారని ఆరోపించారు. రైతులు పంటలను కాపాడుకునేందుకు నీళ్ల కోసం ఎదురుచూస్తుంటే, బీర్ల ఉత్పత్తికి నీటిని ఎలా కేటాయిస్తారని ప్రశ్నించారు. “తాగు, సాగునీటిని బీర్ల తయారీకి పంపిస్తుంటే కేసులు ఎందుకు పెట్టరు?” అని నిలదీశారు. ప్రజల అవసరాల కంటే మద్యం పరిశ్రమలకు ప్రాధాన్యం ఇవ్వడం ప్రభుత్వ వైఖరిని తెలియజేస్తోందని విమర్శించారు.
నీళ్లు తీసుకున్న రైతులపై కేసులా?
జూరాల ప్రాజెక్టులో నీళ్లు కనిపిస్తున్నా పంటలు ఎండిపోతున్నాయని, వాటిని కాపాడుకునేందుకు గేట్లు తెరిచి నీటిని తీసుకున్న 14 మంది రైతులపై నాన్‌ బెయిలబుల్‌ కేసులు పెట్టారని హరీశ్‌రావు ఆరోపించారు. దేశానికి అన్నం పెట్టే రైతులు తమ పంటలను రక్షించుకునేందుకు ప్రయత్నిస్తే కేసులు పెట్టడం ఎంతవరకు సమంజసమని ప్రశ్నించారు. “ఏపీలో లేని కరువు తెలంగాణలో ఎందుకు వచ్చింది?” అంటూ ప్రభుత్వాన్ని నిలదీశారు. కృష్ణా, గోదావరి నదులు రాష్ట్రం నుంచి ప్రవహిస్తున్నా, ముఖ్యమంత్రి రేవంత్‌రెడ్డి నీటిని వదిలేస్తుంటే, ఏపీ సీఎం చంద్రబాబు నాయుడు నీటిని ఒడిసిపడుతున్నారని వ్యాఖ్యానించారు. “గురు దక్షిణ చెల్లిస్తున్నావా రేవంత్‌రెడ్డి?” అంటూ రాజకీయ విమర్శలు చేశారు.
కృత్రిమ కరువుకు ప్రభుత్వమే కారణమా?
తెలంగాణలో రైతులు నీటి కొరతతో ఇబ్బందులు పడుతుంటే ముఖ్యమంత్రి రేవంత్‌రెడ్డి, మంత్రులు గోవా, ఢిల్లీ పర్యటనల్లో తిరుగుతున్నారని హరీశ్‌రావు విమర్శించారు. రైతుల కష్టాలపై ప్రభుత్వానికి బాధ్యత లేదా అని ప్రశ్నించారు. ఇది ప్రకృతి తెచ్చిన కరువు కాదు.. విద్యుత్‌ ఉత్పత్తి చేయలేక, మోటార్లు నడపలేక రేవంత్‌రెడ్డి ప్రభుత్వం సృష్టించిన కృత్రిమ కరువు అని ఆరోపించారు. సాగునీటి నిర్వహణలో వైఫల్యం, రైతుల సమస్యలపై నిర్లక్ష్యమే ప్రస్తుత పరిస్థితులకు కారణమని పేర్కొన్నారు. సింగూరు జలాల వినియోగం, జూరాల రైతులపై కేసుల వ్యవహారంలో ప్రభుత్వం స్పష్టత ఇవ్వాలని డిమాండ్‌ చేశారు.
#HarishRao #SingurProject #TelanganaWaterCrisis #FarmersIssues #BRS #RevanthReddy #LiquorFactories #IrrigationWater #JuralaProject #TelanganaPolitics #FarmersProtest #WaterManagement #Agriculture #BRSvsCongress #TelanganaNews
