కాల్ సెంటర్ ఫిర్యాదుపై ప్రత్యేక నజర్.
ప్రతి ఫిర్యాదుకు పరిష్కారం చూపిస్తాం.
22ఏ నిషేధిత భూముల సమస్యపై తెలంగాణ ప్రభుత్వం మరింత వేగంగా చర్యలు చేపట్టాలని మంత్రి పొంగులేటి శ్రీనివాసరెడ్డి అధికారులను ఆదేశించారు. కాల్ సెంటర్కు వచ్చే ప్రతి ఫిర్యాదును కేవలం దరఖాస్తుగా కాకుండా బాధ్యతగా తీసుకుని, పరిష్కారం అయ్యే వరకు పర్యవేక్షించాలని స్పష్టం చేశారు. ప్రజలు తమ సమస్యను చెప్పిన తర్వాత పరిష్కారం కోసం మళ్లీ మళ్లీ రెవెన్యూ కార్యాలయాల చుట్టూ తిరిగే పరిస్థితి ఉండకూడదని మంత్రి తేల్చిచెప్పారు. 22ఏ అంశంపై ప్రజలు ఎలాంటి ఆందోళన చెందాల్సిన అవసరం లేదని, నిజమైన హక్కుదారులకు ప్రభుత్వం అండగా నిలుస్తుందని భరోసా ఇచ్చారు. అర్హత ఉన్న ప్రతి దరఖాస్తుదారుడికి న్యాయం జరిగేలా చర్యలు తీసుకుంటామని తెలిపారు.
400 కాల్స్.. అధికారులకు కీలక ఆదేశాలు
22ఏ ఫిర్యాదుల కోసం ఏర్పాటు చేసిన కాల్ సెంటర్ పనితీరుపై మంత్రి బుధవారం అధికారులతో టెలికాన్ఫరెన్స్ నిర్వహించారు. ఇప్పటివరకు సుమారు 400 కాల్స్ వచ్చినట్లు అధికారులు మంత్రికి వివరించారు. ఏ అంశాలపై ఎక్కువగా ఫిర్యాదులు వస్తున్నాయి, వాటిపై ఎలాంటి చర్యలు తీసుకుంటున్నారు, దరఖాస్తుదారులకు ఏ సమాచారం అందిస్తున్నారన్న వివరాలను మంత్రి అడిగి తెలుసుకున్నారు. కాల్ సెంటర్లో నమోదైన ప్రతి ఫిర్యాదు వివరాలను వెంటనే సంబంధిత తహసీల్దార్, ఆర్డీవో, సబ్రిజిస్ట్రార్ అధికారులకు పంపించాలని ఆదేశించారు. ఫిర్యాదు అందిన వెంటనే అధికారులు స్పందించి, భూమి 22ఏ జాబితాలోకి ఎందుకు వచ్చింది, దరఖాస్తుదారుడికి అర్హత ఉందా, ఫిర్యాదులోని అంశాలు వాస్తవమా అనే విషయాలను క్షేత్రస్థాయిలో పరిశీలించాలని సూచించారు. పరిశీలన అనంతరం స్పష్టమైన కారణాలతో నిర్ణయం తీసుకోవాలని చెప్పారు.
పెండింగ్ దరఖాస్తులపై తక్షణ పరిష్కారం
సబ్రిజిస్ట్రార్లు, తహసీల్దార్లు, ఆర్డీవోలు, కలెక్టర్ల స్థాయిలో పెండింగ్లో ఉన్న దరఖాస్తులను వెంటనే పరిష్కరించాలని మంత్రి ఆదేశించారు. గత రెండు మూడు రోజుల్లో కొత్తగా వచ్చిన దరఖాస్తులను కూడా ఆలస్యం చేయకుండా పరిశీలించాలని సూచించారు. 22ఏ సమస్యను ప్రత్యేక టాస్క్గా తీసుకుని అధికారులు నిరంతరం ప్రజలకు అందుబాటులో ఉండాలని స్పష్టం చేశారు. రెవెన్యూ శాఖ, స్టాంప్స్ రిజిస్ట్రేషన్ అధికారులు సమన్వయంతో పనిచేయాలని ఆదేశించారు. వచ్చిన దరఖాస్తును మరో కార్యాలయానికి పంపించి బాధ్యత నుంచి తప్పుకోవద్దని, సమస్య పూర్తిగా పరిష్కారమయ్యే వరకు పర్యవేక్షించాలని సూచించారు. రెవెన్యూ కార్యాలయానికి వచ్చిన వ్యక్తి తన సమస్య పరిష్కారమవుతుందన్న నమ్మకంతో బయటకు వెళ్లేలా అధికారులు పనిచేయాలని మంత్రి స్పష్టం చేశారు. ప్రభుత్వ విధానాలకు అనుగుణంగా నిర్ణయాలు తీసుకోవాలని, సొంత నిర్ణయాలతో ప్రజలకు ఇబ్బందులు కలిగించవద్దని అధికారులకు సూచించారు.
#PonguletiSrinivasReddy #22ALands #Telangana #TelanganaGovernment #RevenueDepartment #LandIssues #22AProperties #CallCentre #LandComplaints #RevenueOfficials #LandRegistration #TelanganaNews #LatestNews #GovernmentAction
