ఐపీఎల్‌ 2027కు ముందే చెన్నై సూపర్‌ కింగ్స్ (సీఎస్కే)లో మార్పుల తుఫాను కొనసాగుతోంది. ఇప్పటికే హెడ్‌ కోచ్‌గా జహీర్‌ ఖాన్‌ను నియమించిన యాజమాన్యం, ఇప్పుడు బ్యాటింగ్‌ కోచ్‌ మైకేల్‌ హస్సీతోనూ బంధానికి ముగింపు పలికినట్లు సమాచారం. దీంతో సీఎస్కేతో ఆస్ట్రేలియా మాజీ క్రికెటర్‌కు 15 ఏళ్లకు పైగా సాగిన అనుబంధానికి తెరపడినట్లయింది. ఆటగాడిగా రెండు, కోచ్‌గా మూడు ఐపీఎల్‌ టైటిళ్లు సాధించడంలో హస్సీ కీలక పాత్ర పోషించాడు. ఒకప్పుడు సీఎస్కే బ్యాటింగ్‌కు వెన్నెముకగా నిలిచిన ఈ ఎడమచేతి వాటం ఆటగాడు, 2013 సీజన్‌లో ఏకంగా 733 పరుగులు సాధించి తన సత్తా చాటాడు. క్రిక్‌బజ్‌ కథనం ప్రకారం, హస్సీకి నిర్ణయాన్ని యాజమాన్యం అధికారికంగా తెలియజేసింది. అయితే ఐపీఎల్‌ 2027లో మరో ఫ్రాంచైజీ సహాయక బృందంలో చేరే అవకాశాలున్నాయి. ఇప్పటికే 18 ఏళ్లపాటు హెడ్‌ కోచ్‌గా పనిచేసిన స్టీఫెన్‌ ఫ్లెమింగ్‌, బౌలింగ్‌ కోచ్‌ ఎరిక్‌ సైమన్స్‌ జట్టును వీడగా, ఫీల్డింగ్‌ కోచ్‌ జేమ్స్‌ ఫోస్టర్‌ భవిష్యత్తుపైనా అనిశ్చితి నెలకొంది. మరోవైపు మాజీ సీఎస్కే పేసర్‌ మోహిత్‌ శర్మకు బౌలింగ్‌ కోచ్‌ బాధ్యతలు అప్పగించారు. ఈ మార్పుల్లో కెప్టెన్ మహేంద్ర సింగ్‌ ధోనీ కీలక పాత్ర పోషిస్తున్నట్లు సమాచారం. హస్సీ స్థానంలో కొత్త బ్యాటింగ్‌ కోచ్‌గా ఎవరిని నియమిస్తారన్నది ఇప్పుడు ఆసక్తికరంగా మారింది. ఐదు టైటిళ్ల విజయగాథలో భాగమైన హస్సీ నిష్క్రమణతో సీఎస్కే కొత్త శకానికి సిద్ధమవుతోంది.
#CSK #MichaelHussey #IPL2027 #ChennaiSuperKings #CSKNews #MSDhoni #StephenFleming #EricSimons #MohitSharma #ZaheerKhan #IPLNews #CricketNews #BattingCoach #CoachingChanges
