ఒక్కసారిగా ఐదుగురు యువతులు మాయం.
అర్ధరాత్రి వరకు అన్నీ సాధారణంగానే ఉన్నాయి. హాస్టల్‌లో ఉన్న యువతులు తమ గదుల్లోనే ఉన్నారు. తెల్లారేసరికి మాత్రం ఐదుగురు యువతులు కనిపించలేదు. గదుల్లో వెతికినా ఆచూకీ లేదు. బయటకు వెళ్లే ప్రధాన ద్వారాల వద్ద కూడా ఎలాంటి సమాచారం లేదు. చివరకు హాస్టల్‌ సిబ్బంది పరిశీలించగా కిటికీ వైపు అనుమానాస్పద ఆనవాళ్లు కనిపించాయి. కిటికీ గ్రిల్స్‌ను కట్‌ చేసి బయటకు వెళ్లినట్లు గుర్తించారు. విశాఖలో చోటుచేసుకున్న ఈ ఘటన ఇప్పుడు సినిమా సన్నివేశాన్ని తలపిస్తోంది. అయితే ఇది కేవలం పరారీ ఘటనగానే చూడాలా? లేక ముందుగానే వేసుకున్న ప్రణాళిక ప్రకారం యువతులు హాస్టల్‌ నుంచి బయటపడ్డారా? అన్న ప్రశ్నలు ఇప్పుడు చర్చనీయాంశంగా మారాయి.
గ్రిల్స్‌ కట్‌ చేసినా గుర్తించలేదా?
ఒక్కరు కాదు.. ఐదుగురు యువతులు ఒకేసారి హాస్టల్‌ నుంచి బయటకు వెళ్లడం భద్రతా ఏర్పాట్లపై అనుమానాలు పెంచుతోంది. కిటికీ గ్రిల్స్‌ను తొలగించేంత సమయం వారికి ఎలా దొరికింది? ఆ సమయంలో సిబ్బంది ఏం చేస్తున్నారు? ముందుగానే అవసరమైన ఏర్పాట్లు చేసుకున్నారా? అనే ప్రశ్నలకు సమాధానాలు రావాల్సి ఉంది. పరారైన వారిలో ఇద్దరు బంగ్లాదేశ్‌కు చెందినవారు, ఇద్దరు ఉత్తరప్రదేశ్‌కు చెందినవారు, ఒకరు పశ్చిమ బెంగాల్‌కు చెందిన యువతి ఉన్నట్లు సమాచారం. వీరంతా కలిసి ఎందుకు బయటకు వెళ్లారు? ఎక్కడికి వెళ్లాలనుకున్నారు? ఎవరి సహకారం తీసుకున్నారు? అన్నదానిపై స్పష్టత రావాల్సి ఉంది.
సీసీ కెమెరాలే కీలక ఆధారం
ఐదుగురు యువతులు కనిపించకపోవడంతో హాస్టల్‌ సిబ్బంది వెంటనే అప్రమత్తమై పోలీసులకు సమాచారం అందించారు. విషయం తెలిసిన పోలీసులు హాస్టల్‌కు చేరుకుని పరిసర ప్రాంతాల్లోని సీసీ కెమెరాల ఫుటేజీని పరిశీలిస్తున్నారు. యువతులు ఏ దారిలో వెళ్లారు? ఎవరినైనా కలిశారా? హాస్టల్‌ బయటకు వచ్చిన తర్వాత ఎక్కడికి వెళ్లారు? అనే కోణాల్లో ఆరా తీస్తున్నారు. అదే సమయంలో కిటికీ గ్రిల్స్‌ కట్‌ చేయడానికి ఉపయోగించిన వస్తువులు ఎక్కడి నుంచి వచ్చాయి? హాస్టల్‌లో భద్రతా లోపం ఎలా ఏర్పడింది? అన్న అంశాలు కూడా దర్యాప్తులో కీలకంగా మారనున్నాయి. ఐదుగురు ఒకేసారి మాయమైన ఈ ఘటన వెనుక అసలు కథేంటన్నది ఇప్పుడు పోలీసుల దర్యాప్తుతో తేలాల్సి ఉంది.
#Visakhapatnam #Vizag #HostelEscape #HostelMystery #FiveWomenMissing #VisakhapatnamNews #HostelIncident #CCTVInvestigation #PoliceInvestigation #HostelSecurity #AndhraPradeshNews #VizagNews #MissingWomen #CrimeNews #LatestNews
