ఓట్ల తొలగింపుపై సిబల్ సంచలన ఆరోపణలు

బల్క్ డిలీషన్లపై సుప్రీంకోర్టు జోక్యం కోరిన సిబల్.


రాజ్యసభ ఎంపీ, మాజీ కేంద్ర మంత్రి కపిల్ సిబల్ ఓటర్ల జాబితాలో జరుగుతున్నట్లు ఆరోపిస్తున్న ‘బల్క్ డిలీషన్ల’పై సుప్రీంకోర్టు జోక్యం చేసుకోవాలని కోరారు. ఎన్నికల జాబితాల ప్రత్యేక సమగ్ర సవరణ (సర్) ప్రక్రియను అడ్డుకోవాలని ఆయన విజ్ఞప్తి చేశారు. ఈ ప్రక్రియ బీజేపీకి ఎన్నికల్లో ప్రయోజనం కల్పించేలా సాగుతోందని ఆరోపించారు. బుధవారం ఎక్స్‌లో చేసిన పోస్టులో దీనిని ‘ఎక్స్‌క్లూజన్ పాలిటిక్స్’గా అభివర్ణించారు. బీజేపీ ఏజెంట్లు ముస్లింలను లక్ష్యంగా చేసుకుని పెద్ద సంఖ్యలో పేర్లు తొలగించేందుకు ప్రయత్నిస్తున్నారని సిబల్ ఆరోపించారు. “సుప్రీంకోర్టు దీనిని ఆపాలి” అని స్పష్టం చేశారు.

ఫారం-7 దుర్వినియోగం జరుగుతోందా?

జార్ఖండ్‌లో ఓటర్ల జాబితా నుంచి పేర్లు తొలగించేందుకు ఉపయోగించే ఫారం-7ను బీజేపీ కార్యకర్తలు పెద్ద సంఖ్యలో సమర్పిస్తున్నారనే నివేదికను సిబల్ ప్రస్తావించారు. ఒకేసారి 45, 100, 400 వరకు ఫారాలు సమర్పించవచ్చని, తొలగింపుకు కారణం చూపకపోయినా ప్రక్రియ కొనసాగించే అవకాశం ఉందని ఆయన ఆరోపించారు. అయితే నిబంధనల ప్రకారం ఫారం-7 ద్వారా మరణం, ప్రాంతం మారడం, ఓటు హక్కుకు అనర్హత వంటి కారణాలతో పేరు తొలగింపును కోరవచ్చు. దరఖాస్తుపై బూత్ లెవల్ అధికారి లేదా ఎన్నికల రిజిస్ట్రేషన్ అధికారి విచారణ జరపాలి. ఓటరుకు నోటీసు ఇచ్చిన తర్వాతే తుది చర్య తీసుకోవాల్సి ఉంటుంది. రాజస్థాన్, గుజరాత్, అసోం రాష్ట్రాల్లో కూడా ఇలాంటి బల్క్ ఫారం-7 దరఖాస్తులు వెలుగులోకి వచ్చినట్లు సిబల్ పేర్కొన్నారు.

ముస్లిం ఓటర్లే లక్ష్యమా?

తొలగింపునకు గురయ్యే జాబితాలో ఉన్న పలువురు ముస్లింలు ఏళ్లుగా అదే ప్రాంతాల్లో నివసిస్తున్నవారేనని సిబల్ ఆరోపించారు. నిష్పాక్షికంగా ఎన్నికల ప్రక్రియ సాగుతున్నదని కోర్టులు భావించి ఈ అంశాన్ని పట్టించుకోకపోతే ప్రజాస్వామ్యానికి తీవ్ర ప్రమాదం ఏర్పడుతుందని హెచ్చరించారు. ఎన్నికలు జరిగే ప్రతి రాష్ట్రంలో ఇదే పరిస్థితి పునరావృతమయ్యే అవకాశం ఉందన్నారు. జార్ఖండ్‌లో విపక్ష ప్రభుత్వం ఉండటంతో అక్కడ బీఎల్ఓలు అభ్యంతరం చెబుతున్నారని, బీజేపీ అధికారంలో ఉన్న రాష్ట్రాల్లో ఇలాంటి చర్యలను ఎవరు ప్రశ్నిస్తారని సిబల్ ప్రశ్నించారు. ఈ ఆరోపణలు కాంగ్రెస్ అధ్యక్షుడు మల్లికార్జున ఖర్గే, లోక్‌సభ ప్రతిపక్ష నేత రాహుల్ గాంధీ మహారాష్ట్ర సప్‌పై చేసిన విమర్శల తర్వాత వచ్చాయి. మహారాష్ట్ర డ్రాఫ్ట్ ఓటర్ల జాబితాలో 2.06 కోట్ల పేర్లు తొలగించడాన్ని వారు ప్రస్తావిస్తూ, బీజేపీకి అనుకూలంగా ఓట్లను చేర్చడం, తొలగించడం జరుగుతోందని ఆరోపించారు.

#KapilSibal #VoterDeletion #BulkVoterDeletion #VoterList #ElectoralRoll #SIR #SupremeCourt #Form7 #BJP #MuslimVoters #Jharkhand #ElectionCommission #ElectionNews #IndianPolitics